3/31/2010

الجيش المصري يستعين بمروة (الصراحه راحه يا عيني و جيشنا مبيعرفش)

في شارع صلاح سالم تقع دار الحرس الجمهوري واحدة من دارات القوات المسلحه و هذه الدارات تقوم بانشطه عديده لا اعرف ما هي علاقتها بالجيش ,مثل عملها كمطاعم ونوادي و عمل الحلوي و الخبز و دور السينما و مؤخرا اقامة الحفلات الغنائية , في واجهة دار الحرس الجمهوري اعلان ضخم لحفلة شم النسيم للمغنيه مروة (الصراحه راحه) ,هل يتخيل احد ان تكون من ضمن ميزانيه وزارة الدفاع مبلغ سيتم دفعه لمروة علي اساس ان الجيش تحول لمنتج اغاني هابطه و كل غرضه هو المكسب الا اذا كانوا يعتبرون مروة من اسلحة الدمار الشامل

عودة لطرائف الموظفين

مديرة القسم عندنا نصحت زميلتنا الموظفة الحامل اللي حست بتعب بانها تطلع لمكان صلاة السيدات فوق علشان تنام هناك و لو فيه حاجه نكلمها علي الموبايل و قالتلها فيه ستات كتير بيحطوا الاسدال تحت راسهم و يناموا !
وكيلة القسم بقي اللي عندنا قاعده في اوضه فيها 7 ستات و 3 اولاد ,هيه منقبه و كانت جايبه معاها زبادي و عاوزه تاكله فمنفعش مع النقاب فخرجت ال 3 اولاد بره و قفلت عليها الاوضه لغاية متاكل الزبادي !

3/30/2010

المستشار نائب رئيس حروق الانسان يتكلم

في حوارفي جريدة الشروق للمستشار مقبل شاكر الرئيس الاسبق للمجلس الاعلي للقضاء و نائب رئيس المجلس القومي لحقوق الانسان , كانت هذه بعض ردوده علي الاسئلة الموجهه اليه
-بخصوص المدون المحال الي محكمة عسكريه قال القول الفصل للمحكمه ولا تدخل في احكام القضاء (مع ان ابسط حقوق الانسان ان يحاكم امام محكمه مدنيه مادام هو مدنيا )
-عن التعذيب في مصر قال .. ان التعذيب يجرمه القانون المصري و انه موجود في دول كثيرة منها دول متقدمه ( الحجه الفاشلة بان اي مصيبه تحدث فهي تحدث في العالم طبعا استخدام حجج من هذا النوع يبين عدم وجود نية للتصدي للتعذيب حتي لا نتخلف عن العالم !)
- بخصوص المادة المقيده لحق المواطنين في الترشح للرئاسه فهو يستخدم المنطق نفسه في ان امريكا بها شروط للترشح و هذه ليست بدعه( العجيب طريقه ولا تقربوا الصلاه هل نحن اخذنا النظام السياسي كله من امريكا بالطبع لا لكننا سنأخذ قيود الترشيح فقط و نطبقها في غير موضعها)
- اما بخصوص التوترات الطائفيه فيري سيادته ان هناك ايادي خفية تعبث في هذا الموضوع قد تكون موساد او مخابرات او يهود(حجه اخري مكرره و ممله و هي القاء المسئوليه علي اي طرف خارجي و حبذا لو كان اسرائيل او امريكا ولا استطيع تخيل الموساد و قد تغلغل في مرسي مطروح او نجع حمادي و قام العملاء باقناع مسلم بفتح النيران علي مسيحيين او استغلال بناء سور للاشتباك بين الطرفين هذه هي طريقة لعدم حل اي مشكله و عدم الاعتراف بوجود عيوب فينا )

3/28/2010

شكرا للاحتلال الامريكي

بنظرة علي الانتخابات العراقية يمكنك التفرقه بين الانتخابات المصرية حيث يكتسح حزب الحكومه و بين الانتخابات الحقيقيه الحره ,نتائج الانتخابات العراقية جاءت كالتالي
91 مقعدا لاياد علاوي
89 مقعدا لنوري المالكي
70 مقعد للائتلاف الشيعي
43 مقعدا للتحالف الكردستاني
كما تري لا توجد اغلبيه لاي منهم و عليهم الدخول في تحالفات ,هكذا تكون الديموقراطيه , قارن بين هذا التنوع و بين حكم البعث في عهد صدام , لقد وعدت امريكا بالديموقراطية و قد اوفت بوعدها , انا بالطبع ضد الغزو و الاحتلال الخارجي و لكن احيانا يكون ذلك هو الدواء المر, تخيل استمرار صدام في الحكم ثم توريثه لولديه و استمراره في القمع و قتل ابناء شعبه , اذا كان هناك ضحايا للقمع او للغزو فربما يكون الغزو اكثر رحمة

3/26/2010

تخيل انك بترمم جامع.. فتترمي في السجن.

(قضت محكمة جنح مستأنف شبرا الخيمة ببراءة القمص اندراوس رشدي الياس كاهن كنيسة السيدة العذراء بشبرا الخيمة والغاء حكم محكمة اول درجة القاضي بحبسه سنة مع الشغل وغرامة‏75‏ الف جنيه مثلي اعمال البناء المخالفة‏,) لك ان تتخيل انك بتعمل ترميم لكنيسه من غير ما تاخد اذن تروح المحكمه و تاخد سنة سجن و غرامه 75 الف جنيه طب القاضي اللي حكم بكده ده يبقي ايه مش اقل من انه يكون مسلم متعصب و القانون نفسه قانون منحاز و ظالم وفيه اضطهاد للاقباط ده غير انه مخالف للدستور اللي بينص علي المساواة بين كل المواطنين و حريتهم في اقامه شعائرهم , ده فيه ناس بتبني علي الارض الزراعيه و مبيتعاقبوش و ناس بتبني عمارات مخالفه و مبيحصلش ليهم حاجه , الحمد الله انهم وقعوا في الاستئناف في قاضي عادل و بيفهم !

3/25/2010

عزيزي المواطن المسيحي .. و لسه

الخبر بيقول :- تنازل الاقباط في النيابه العامه في محافظة مطروح عن البلاغات اللي قدموها في المسلمين بخصوص حرق و اتلاف ممتلكاتهم بعد جلسة الصلح اللي اقيمت في خيمة بدوية بحضور المحافظ و مطران الكنيسه ووكيل وزارة الاوقاف .يعني بالبلدي كده اللي اتكسر يتصلح و قوم يا محمد بوس علي دماغ اخوك جرجس ,طبعا الواضح انه هيتم تعويض المسيحين ماديا و يخلص الموضوع , الخطورة في كده اولا- انه ده تصريح للمسلمين انهم لما يلاقوا المسيحيين بيبنوا كنيسه ولا بيعملوا سور ولا اي خناقه معاهم يعملوا ما بدالهم مادام العمليه هترسي علي قعده صلح و تعويضات و خلصت القصه فطبعا منستغربش لما ده يحصل في محافظه جديده لانه بدلا من الردع البلاغات بيتم التنازل عنها ,ثانيا ده اهدار لفكرة الدولة المدنيه و سيادة القانون فيه حاجه اسمها محافظ يعمل قعدة عرب و كاننا قبائل مش مواطنين في دولة بيحكمها قانون ثالثا المواطن المسيحي غلطان انه بيسلم امره لرجل الدين المسحي علي انه ولي امره يتفاوض في حقه و يقوله اعمل كذا , مع كل الاساليب دي نلتقي بحادث طائفي جديد .. بعد الفاصل

3/20/2010

نعيش احنا .. و الاقصي مش مهم

الاغنيه كانت بتقول ( يا بيوت السويس يا بيوت مدينتي استشهد تحتك و تعيشي انتي) كانت في حرب الاستنزاف تقريبا بس انا مش فاهمها بصراحه . ايه الفايده في اني اموت علشان تعيش بيوت المفروض العكس, هوه ايه الاهم البني ادم ولا شوية حجاره اسمها بيوت السويس, جت في بالي الفكره دي و انا باتابع رد الفعل علي تهديدات اسرائيل للمسجد الاقصي و سألت نفسي هوه ايه الاهم ؟ هل خوفنا علي مبني قديم اسمه المسجد الاقصي ولا كرامة مواطن زي الدكتور المؤيد للبرادعي في الفيوم اللي تم تعذيبه و التنكيل بيه, هتلاقي مظاهرات عارمه دفاعا عن الاقصي , لكن مشوفناش مظاهرة ضخمة علشان كرامة بني ادم مصري و كل ده علشان فكرة انه الدفاع عن الاقصي واجب ديني ووطني اما الانسان مفيش ما يدعو للدفاع عنه. طول ما احنا عايشين علشان الشعارات بدل ما نخلي الشعارات مرفوعه علشاننا معتقدش انه هينصلح حالنا

3/12/2010

اضحك مع الشريعة الاسلامية (كلاكيت تاني مرة)

جلد سعوديين للخلوة بسيدة عجوز
نفذت شرطة مدينة الشملي التابعة لمنطقة حائل حكم الجلد الصادر من محكمة المدينة علي رجلين متهمين بقضية خلوة غير شرعية مع سيدة من جنسية عربية تبلغ من العمر‏75‏ عاما‏.
(من جريدة الاهرام ) و ادي كمان نموذج لتطبيق الشريعة الاسلامية و تطبيقها , تخيل نفسك رايح تزور واحده قريبتك او والدة واحد صاحبك تلاقي نفسك مقبوض عليك و تتجلد علشان دي خلوة غير شرعية, ده كله نتيجة لانتشار الفكر الوهابي اللي بيتلخص في التطبيق الحرفي للنصوص بدون تفكير و اللي بيتوغل في مصر عن طريق الجوامع و القنوات الفضائية, و لسه ياما السعودية هتورينا

3/10/2010

اغتصب بنتك وفقا للشريعة الاسلامية

رياض ـ د ب أ: أعلن مئات السعوديين عبر المدونات والشبكات الاجتماعية الإلكترونية عن استيائهم الشديد من حكم قضائي بالسجن لمدة أربع سنوات أصدرته المحكمة العامة في الدمام (شرق المملكة) على مواطن سعودي أربعيني أدين باغتصاب ابنته التي لم تتجاوز السادسة عشرة من عمرها أكثر من مرة قبل أن تنكشف جريمته يعني اغتصاب و لقاصر و كمان بنته و الحكم باربع سنين و ده في الدولة اللي بتطبق الشريعة الاسلامية اللي دعاة الدولة الاسلامية اللي بيقولوا انه فيها الردع الكافي اللي هيخلي الجرايم تبقي اقل و الفكرة الوهمية انه لما هنطبق الشريعة مش هيبقي فيه جعان ولا محتاج ولا اجرام و مش فاهمين انه الشريعه دي هيطبقها بني ادمين و انها مش مناسبة لكل زمان و مكان زي ما بيقولوا و ان تطبيقها ممكن يسبب كوارث و ادي يا سيدي نموذج حي للشريعه .. حلال عليكم

3/05/2010

دكاترة ازهر تخصص خرافات

من جريدة الاهرام ليوم الجمعه :- لدكتور عمر عبد العزيز الأستاذ بكلية الدعوة إلاسلامية بجامعة الأزهرقد تحققت مجموعة من الكرامات للصالحين بعد سؤالهم الله عز وجل ودعائهم بها‏,‏ مثل دعاء العلاء بن الحضرمي‏:‏ يا حليم يا عليم يا علي يا عظيم اسقنا‏.‏ ودعائه بمثله حتي مشي جيشه علي النهر‏.‏ وغير ذلك من الأدلة علي جواز سؤال الله خوارق العادات علي وجه الكرامة‏.‏ ( لما يكون ده دكتور في الازهر معتقد انه فيه واحد خلا الدنيا تمطر علشان عطشانين او علشان جيشه يمشي علي الميه هيكون ايه شكل الطلبة بتوعه ) ,‏ كما ورد أن بعض الصالحين تكلموا بعد موتهم أو نظر في وجوههم فرؤي النور ( و دكتور تاني مقتنع بانه ممكن واحد يتكلم بعد ما يموت او وشه ينور و العجيب انه اكبر جريدة في مصر تنشر الخرافات دي في صفحة اسمها فكر ديني امال لو اسمها خرافات دينية كان هيبقي ايه الوضع )