الخميس، 17 ديسمبر، 2015

ألبوم شارموفرز ..الصوت الساخر للطبقة الوسطى

بدأت شهرة فريق “شارموفرز” مع أغنية “خمسة سانتي ” و اللي حددت مكانهم وسط الفرق الغنائية .. الأغنية كانت انتقادية و ساخرة في نفس الوقت ..بمعني انهم مش من الفرق الغنائية اللي بتقدم أغاني التفاؤل المستمر من نوعية بكرة أحلي ولا من نوعية الفرق اللي بتتكلم عن الألم و المعاناة ..هما بيعبروا عن قطاع من الطبقة الوسطي المصرية و ده كان واضح في الأغنية اللي بتتكلم عن المشاكل اللي بتواجه شاب بيصحي الصبح بداية من المية المقطوعة لالبواب اللي مغرق العمارة و بعد كده مشاكل الشارع من غرائب المرور و الحر كل
ده بكلمات ساخرة و موسيقي فيها مزيج من موسيقي الريجي و الموسيقي اللاتينية
ناس كتير راهنت علي ان “شارموفرز ” هيكونوا فريق الأغنية الواحدة و مش هيقدروا يخرجوا من فكرة تكرار نوعية الموسيقي و الأداء ..لكن انا شايف انهم نجحوا في البوم “بارانويا” انهم يقدموا أشكال موسيقية مختلفة و غير متوقعة و كلمات جديدة متناسبة معاهم و مع جمهورهم

فيما يلي تحليل لكل أغاني الألبوم

1-خلاص هاسيطر
و اللي فيها محاكاة ساخرة لأغنية شعبان عبد الرحيم “هابطل السجاير ” بس اتحولت ل” هابطل الدخان و مش هاحتاج ل لايتر” و اللي فكرتها هي تكبير الدماغ عن المشكلات و القلق الموجود دلوقتي “تعمل مشكلة ليه هتستفيد ايه ” وهو المشهد اللي بنشوفه في الشارع من شباب حاطط سماعات في ودنه ولا يبالي بأي شيء يحدث
2-البوكسر
بداية من صدمة الاسم لبعض الأجيال بينما الأغنية هي تعبير عن فكرة الاستمتاع بأشياء بسيطة استهلاكية طبعا و لكنها هي طرق الاستمتاع السهلة بالنسبة للطبقة المتوسطة ..ساندوتشات من ماكدونالدز ..موسيقيا : الأغنية تمزج بين موسيقي الروك و الايقاعات الشرقية بشكل مختلف .
3-بارانويا
و المشكلة هي “من انا؟ بدلة و كرافتة ولا شورت و باندانا ” مشكلة الاختيارات بين القيود المنتظرة للشباب و بين الأحلام المفتوحة بلا حدود “قالوا عليا مجنون كتير ” و الهروب من مشكلة الاختيارات و ضغوط المجتمع اللي ممكن تؤدي للبارانويا بيكون في الأحلام اللي بترجع لمرحلة الكهوف و الأفيال.
4-مش فارقة
الأغنية الأكثر سخرية من الموضوع المقدس في الطبقة الوسطي ..الجواز ..تدمير شامل لكل الكليشيهات المكررة علي ايقاع المقسوم .. “و اتفشخر بيها قدام الناس ” “ولا ماما كل يوم تزن عليا ” فكرة الزواج ارضاء لضغوط الاقارب أو ارضاء المجتمع “ما تتجوزها دي خدودها مبقلظة ” نوعية الاسباب اللي بيتم اقناع الشاب بيها علشان يتحمس للجوازة “ماما قفشت البت كانت فلة ” السخرية هنا من فشل زيجات الصالونات اللي بتتم تحت نفس الضغوط و انه الشاب نفسه هيكون هو الضحية ..بينما في نفس النص التاني الاغنية صورة مبالغ فيها و ساخرة برضه من الزواج اللي هيكون نتيجة للانجذاب السريع “و آخدك هاني مون في اتينا و نبوس بعض فرينشات ” ..الاغنية في مجملها سخرية من “موسم التزواج” عند الشباب ” .
5-بووت
عن النظرة الجديدة للعلاقة بين الراجل و المرأة “زمن سي السيد مات ” “السلام و التحية لكل مرأه في كل مكان ” و انه في الزمن الحالي مفيش بدل عن فكرة التفاهم بين الجنسين كطريقة للحياة و انتهاء الطرق التقليدية “رقم واحد نقفش علي بعض و نبقي سيس ”
6-سيبها علي الله
أغنية من أغاني الأمل و لكنها بشكل مختلف مزيج من نصيحة عدم الالتفات للماضي و الاهتمام بالمستقبل مع مسحة دينية “خليها علي الله ” و في نفس الوقت تحذير من انه عليك الانتباه لما سوف تفعل” تغلط الغلطه مره تعليم
احسن من المدارس تغلط الغلطة تاني هنا يحدث كوارث ”
7-النميمة
الأغنية مباشرة أكتر من اللازم و لكن برضه بكلمات جديدة ساخرة و ايقاعات متنوعة راقصة عن واحدة من أهم العادات الاجتماعية المصرية و حالة الكسل العامة”الوقت كالسافوريا اللي بتؤدي لعدم عمل شيء ” سوي النميمة و الحكم علي الناس “البت جيجي ”
8-شامبيون ..شارموفرز العظيم
أغنية حلم شاب الطبقة الوسطي اللي بحاول يحققه في الجيم Gym وهو الحفاظ علي الصحة و الأهم هو الظهور بمظهر الشاب القوي صاحب العضلات “هيشيل حديد و هيبقي بريمو ” و الأهم هو انه يؤكد تفوقه في مجال التنافس الاجتماعي الأبرز حاليا و هو الفيس بوك “صور نفسه ع الفيس بوك عمل ألبوم ” و الأغنية ممكن تكون بتسخر من الحلم نفسه أو بتسخر من الشباب اللي بيفكروا في الحلم ده و دايما بيفشلوا فيه .
“بارانويا” ألبوم مختلف بيعبر عن مشاكل و أحلام جيل بلغته و بطريقته مش مجرد هيصة و تهريج زي ما بعض الناس ممكن تعتقد .

ليست هناك تعليقات:

إرسال تعليق