2/28/2010

البرادعي \ الست هانم

بعد دفعة التفاؤل التي حصلت عليها من حوار البرادعي في العاشرة مساء مع مني الشاذلي . برغم اني لاحظت ان البرادعي يترجم الكلام في رأسه الي العربية قبل النطق به و ذلك ناتج عن قضائه مدة كبيرة بالخارج و هو ما يجعله يفتقد للكاريزما الخطابية لكني رأيت ان كلامه كان مقنعا جدا و متوازنا و هو ما جعلني متحمسا عندما سألني زميلي الموظف الحكومي عن رأيي في البرنامج , لكني فوجئت به غير مقتنع بالبرادعي بمبررات من نوع (اصله كان عايش بره و مش عارف حالنا) ( اصل احنا مش عايزين التغيير لمجرد التغيير) مما جعلني اعيد النظر في فكرة ان الطبقة الوسطي هي التي تدفع المجتمع للتغيير و لكن قطاع كبير منها يخشي من تغيير اي شيء بدءا من وسيلة المواصلات التي يستقلها او وظيفته الحكوميه وصولا الي رئيس الجمهورية و لذلك قد ينتهي بنا الحال الي المشهد الاخير في فيلم امبراطورية ميم عندما يختار الابناء الام (الست هانم) بدلا من مصطفي رمز التغيير.

2/23/2010

مش بهزر .. مكافأة لوزير العدل ب 600000 ج

القصة باختصار فيه مكافأة للعاملين بوزارة العدل بتيجي كل 6 شهور اسمها المطالبة بتتوزع علي جميع العاملين بنسب مختلفة .. يعني الموظف العادي ياخد ما بين 100 و 200 جنيه و طبعا وزير العدل بياخد نسبة من المكافأة دي واضح انها نسبة بسيطة جدا يعني اجمالي المبلغ اللي حصل عليه عن ال6 شهور اللي فاتوا ستمائة الف جنيه و انا شايف الورقه اللي فيها المبلغ بنفسي .. يعني فوق مرتبه و بدلاته و مكافأته ياخد في السنة مليون جنيه ليه يعني؟ ده موظف حكومه في الاول و في الاخر و فين مجلس الشعب و الجهاز المركزي للمحاسبات و الصحافة ازاي يبقي فيه التفاوت الرهيب ده بين دخول اتنين موظفين في الحكومه تلاتلاف ضعف معقول ده!!

2/19/2010

القاتل الحقيقي في جريمة نجع حمادي هو...

في جريدة الاهرام امس الخميس مقالة للانبا بيشوي مقالة بخصوص رواية عزازيل , في البداية يقوم بالرد علي الرواية من الناحية التاريخية و ينفي فكرة التشدد الديني عن الكنيسة و يرجع انتشارها الجماهيري لوجود مشاهد جنسية مطولة بها اما العجيب فهو اتهامه للرواية بقوله (و لعل رواية عزازيل تكون قد ساهمت في شحن المشاعر التي ادت الي قتل شباب مسيحيين ابرياء ليلة العيد في نجع حمادي )اولا مش معقول رواية عن المسيحية هتخلي واحد يقتل المسيحيين ثانيا هوه الكموني اللي قام بالعمليه بيقرا روايات! ثالثا ده تهديد للمؤلفين اي حد هيكتب حاجه عن ديننا يبقي مسئول عن العنف اللي هيحصلنا فالناس تخاف و تبعد , واضح انه فيه رجال دين مسيحيين بيحاولوا يستغلوا احداث العنف و يطلعوا منها بمكاسب سياسية بابتزاز الحكومة و الحصول علي شعبية بين المسيحيين باعتبارهم مدافعين عن المسيحية و هنلاقيها من المشايخ ولا القساوسة!

2/17/2010

قضاة ..للخلف در

حصلت «الشروق» على التفاصيل الكاملة للجمعية العمومية لقضاة مجلس الدولة التى انتهت أمس الأول برفض تعيين المرأة قاضية فى المجلس بأغلبية ساحقة غير مسبوقة، حيث رفض 89% من قضاة المجلس تعيين المرأة فى قضاء المجلس.

وعقب التصويت، تلا رئيس الجمعية العمومية الطارئة بيانا أكد فيه أن تجربة تعيين المرأة فى محاكم الأسرة لم تنجح، لذلك لم تقدم وزارة العدل على تكرارها.

وحذر البيان مما سماه «مخاطر تدرج النساء فى المناصب القضائية على الورق رغم بعدهن عن ممارسة العمل القضائى لانشغالهن برعاية أزواجهن وأولادهن».
يعني ده كلام النخبة من المجتمع و هم القضاة , اولا مش منطقي ان الجمعية العمومية هيه اللي تحدد و الا يبقي ممكن نعمل جمعية عمومية تبحث تعيين المسيحيين مثلا , المفترض هو تطبيق القانون اذا كان فيه ما يمنع تعيين المرأة يبقي ممكن المرأة تسعي لتغييره اما اذا كان لا يمنع فمن حق المرأة التعيين رغم انف الجمعيه العموميه لانه الدستور ينص علي المساواة بين المواطنين
ثانيا استخدام حجج من نوعية انشغال المرأة برعاية بيتها وزوجه دي حجة قديمة جدا و كان بيستخدمها انصار التيار الرافض لعمل المرأة مطلقا و مردود عليها بنقطتين اولا العبرة هي بتأدية العمل دون النظر لظروف الشخص فاذا كانت المرأة لا تؤدي عملها بالكامل عليها الاستقالة اما اذا كانت غير مقصرة فلا يوجد سبب لاستبعادها , ثانيا ما هو القول في حالة وجود امرأة غير متزوجه او امرأة ليس عندها اطفال هل يجوز عندئذ تعيينها
و اذا كانت هذه هي افكار القضاة فماذا ننتظر من باقي افراد الشعب ؟

2/08/2010

تسلم اه تتنصر لا

حكاية النهارده سمعتها برضه من زملاء العمل علي انها حقيقية بس انا شايف فيها مبالغات علشان كده اي شيء غير منطقي يتحمل مسئوليته الزملاء , القصة هيه عن اتنين, موظف و موظفة هوه مسلم و هيه مسيحية ,هوه من الاميرية و هي من مصر الجديده حصل ما بينهم اعجاب و قرروا الزواج و هيه قررت انها تسلم و كان رد فعل اهلها انهم اعتبروها ماتت و لبسوا عليها اسود و عملولها نعي في الجرنال ,اما زميلاتها المسيحيات فواحده رمتها بالشبشب و واحده تفت عليها و واحده قالت دي لازم تتقتل في ميدان عام , اما زميلاتها المسلمات فكانوا بيمدوها بالكتب الدينية و المصاحف , اما رئيس الهيئة الحكوميه لما لقا فيه مشاكل في الموضوع اداها اجازة لمدة سنة باجر كامل , و اتجوزوا في اوضه في بيت عيلته في الاميرية بس دلوقتي بعد كام سنة ربنا كرمهم ب 3 بنات و عندهم شقة في القاهرة الجديدة و عربية و بقت امها تزورهم بس من غير ابوها ما يعرف و هيه دي النهاية الاسلامية السعيدة .

2/06/2010

واحد روما واحد روما

زميلة لينا في المكتب كانت بتحكي عن اختها اللي كانت مسافرة و المفروض توصل المطار قبل الميعاد ب 3 ساعات و لكنها وصلت قبل الميعاد بساعتين ورفضوا انهم يدخلوها و قعدت تتخانق معاهم لكن برضه مفيش فايده فاضطرت تغير الحجز و دفعت فلوس زيادة ف زميلتنا بقي مش عاجبها فقالت المفروض لو الطيارة موجوده و فيه واحد ناقص موجود في المطار الطيارة تستناه !

عدد تسعة جمال مبارك

في الملحق الرياضي ل اخبار اليوم صفحتان مخصصتان لتغطية رحلة اعضاء الحزب الوطني ,عدد الصور الموجود بها جمال مبارك في هاتين الصفحتين تسعة صور ,تخيل ان تشاهد جمال مبارك تسعة مرات في صفحتين من جريدة قومية وهو ما لم يحظي به مبارك نفسه من قبل.

2/05/2010

محافظين سفهاء

قام محافظ البحيرة باهدا لاعب الكرة و هداف كأس الامم محمد ناجي جدو شقة و محافظ الاسكندرية اهداه خمسين الف جنيه , هل يعقل هذا! باي حق يهدي المحافظ نقودا او شقة للاعب كرة و هو سوف يحصل علي عشرات الالوف كمكافأة من اتحاد الكرة و من رجال الاعمال اي انه ليس من المحتاجين و هل من حق اي محافظ ان يبدد اموال المحافظة بدون حساب كأنه هارون الرشيد يعطي من بيت المال للشعراء , و طبعا الغرض من ذلك ان تزداد شعبية المحافظ و ان تظهر صورته في الجرائد ,اما من يستحقون فعلا هذه النقود فعليهم بتعلم كرة القدم اذ ربما ينظر لهم المحافظ وقت اذن بعين العطف.

2/03/2010

الجنيه المحمدي

واحد عندنا في الشغل بيحكي عن العملات النادرة و انها دلوقتي بتساوي مبالغ طائلة فقال انه من العملات النادرة قوي الجنيه اللي عليه جمل ف واحده بتسأله ده من قد ايه قالها ده قديم قوي فقالتله من ايام سيدنا محمد !

شحاتة في الادغال

حسن شحاته جالو عرضين لتدريب نيجريا و الكاميرون و انا واثق انه مش هيوافق بس اعتقد انه لو درب نيجريا (نص الشعب مسلم و نصه مسيحي) هيسميهم منتخب الساجدين و الصليبين اما لو درب الكاميرون هيبقي منتخب الكفار

2/01/2010

غزوة بدر 2010

محمد علي إبراهيم، فقد أراد الأخير أن يؤكد أنه الأسبق في هذا التنبؤ بالنصر، فقال في نفس العدد في مقال عنوانه - يا منتخبنا الغالي، الله أكبر، الكبير كبير بأخلاقه وفنه، وليس بعضلاته وقلة أدبه: 'يشهد الجميع أنني كنت من المتفائلين القلائل أن الله يدخر لمنتخب الساجدين خيرا كثيرا، المولى يمتحن عباده الصابرين ولكنه يبشرهم بنصر وفتح قريب، انتقدوا حسن شحاتة كثيرا، لكن ربنا بيحبه وينصره، قالوا إنه يلجأ للشيوخ والعرافات والدجالين، وأنا أعرف أنه يلجأ لرب العالمين، ومن يلجأ لله فهو حسبه، أولادنا اجتهدوا ونفذوا التعليمات، الله يوفقهم وهذا حق العابدين الخاشعين، نعرف أن الله لا يضيع أجر من أحسن عملا من الساجدين الشاكرين الحامدين وثانيا لأننا في الملمات والمواجهات الصعبة وفي لحظات تقرير المصير نكون على قدر المسؤولية، لأننا ببساطة مصريون'.
- انا حاسس انه بيتكلم عن غزوة بدر و اننا انتصرنا بعد الابتلاء في غزوة احد و طبعا ما دام ربنا نصرنا يبقي اللي قدامنا كفار او من اعداء الله
- هوه علشان كسب بقي ربنا بيحبه و لما اتغلب كان ربنا مبيحبوش
و بعد كل ده نقول اصل المنتخب مش مبني علي اساس ديني و احنا مسمينه منتخب الساجدين

-