أبو نضارة

7/26/2010

الناس عايزه التغيير فعلا

فتحت التليفزيون علي قناة دريم لقيت ناس معترضه علي الاوضاع و بتتكلم بحماس شديد علي انه لازم الناس دي تمشي و لقاء مع ناس علي القهاوي كلهم متفقين علي الفشل اللي حاصل و بعدين جابوا ناس معتصمه حوالين مبني و كاتبين يفط عليها مش هنمشي غير لما تمشوا طبعا هتسأل ده حصل فين هاقولك في الاسماعيلية علشان مجلس الاداره يمشي و مشاكله مع حسني عبد ربه .. يافرحتي بيكم

6/05/2010

شاف التزوير بعينه

اللي سمعته من المديرة اللي في الشغل عن واحد من اللي اشتركوا في الانتخابات بيحكي انه الظباط كانوا بيخبوا البطاقات في جيوبهم و الشرابات و في شنط و طبعا بطاقات متعلمه و جاهزه و بعدين الولد ده اختفي و مبقاش يرد علي اي تليفونات موبايله مقفول و اهله قلقوا عليه مظهرش غير الساعه 9 باليل و السبب انهم ادولوا 300 بطاقة انتخاب يعلم عليهم و يحطهم في الصندوق لكن هوه رفض فاخدوه في اوضه مقفوله و حبسوه فيها لحد ما خلصوا .. و تحيا الست نزيهة

6/03/2010

التزوير المدفون

كاريكاتير عبارة عن صفوت الشريق بيدفن صندوق مكتوب عليه تزوير انتخابات مجلس الشوري و مكتوب تحتيه العدوان الاسرائيلي علي ناشطي السلام و صفوت الشريف بيقول الحمد الله جه في وقته

5/30/2010

هيه دي هيه فرحة الديه

والد سوزان تميم يتنازل عن الدعوى المدنية ضد هشام طلعت مقابل ٧٥٠ مليون دولار
جتلي فكرة كاريكاتير عبارة عن راجل فقير و مراته الراجل بيقول ميجيش واحد ملياردير ييجي يقتل الوليه دي؟

5/02/2010

الاسلام بياكل حقوق المرأة

في جريدة اخبار اليوم كانت الاجابه علي سؤال امرأة مطلقه ( المطلقه طلاقا رجعيا تظل علي ذمة زوجها خلال فترة العدة يجوز لزوجها مراجعتها دون مهر او عقد جديدين و دون رضاها) يعني تخيل نفسك مكانها تم طلاقها و انتهي الامر و بعد 40 يوم مثلا تكون المفاجأه ان زوجها طلعت في دماغه و قالك لما ارجعها العب شويه و فجأة تلاقي الست نفسها رجعت تاني متجوزه بدون وجود اي اعتبار ليها كأنها شيء حقير مش انسان ليه حقوقه و طبعا محدش يجرؤ بالمطالبه بالغاء شيئء زي كده علشان دي شريعه اسلاميه و سلملي علي حقوق النساء في الاسلام و في مصر

4/25/2010

متجوز اربع منقبات و بيشتغل حرامي

الخبر في جريدة الاهرام عن زوج منتقبة فرنسيه وهو فرنسي من اصل جزائري بينتمي لجماعه سلفيه اسمها جماعة التبليغ و متجوز اربع سيدات منقبات و كلهم بياخدوا معونة الام غير المتزوجه يعني باختصار واحد مزور لانه التعدد ممنوع في فرنسا و كمان نصاب و حرامي لانه بياخد فلوس مش من حقه وهوه طبعا بيطبق مبدأ استحلال اموال الكفار بصراحة حلال فيه السجن او سحب الجنسية و طرده من فرنسا خليه يرجع الجزاير يجاهد مع اخوانه يمكن يموت شهيد و نخلص منه .

4/21/2010

اضحك مع الموظفين المتدينين

مديرة المكتب عندنا كانت في عمره و رجعت فبتحكي عن الحرم و الحمام اللي فيه اللي بيطير باليل و موجود امن في الحرم فقال موظف زميلنا ان الحمام ده ملايكه زي ما بيقولوا!
نقاش حاد اندلع بين الموظفين حوالين الفنانات المعتزلات اللي اتحجبوا و اللي رجعوا في كلامهم و اللي بيمثلوا بالحجاب , من ضمن الفنانات دول صابرين فموظف قال انها مش محجبه ولا تعتبر كذلك لان ودانها باينه !