مبارك يضحي بعساكر الشرطه ..صاحب واجب و الله

الخبر عن الافراج عن مشاغبي الترجي التونسي بقرار من مبارك و الاسئله هي :- 1- طول النهار واجعين دماغنا باستقلال النائب العام و انه محدش يقدر يتدخل في شغله .. طب ازاي مبارك يتدخل فالنائب العام يفرج عنهم فورا 2- هوه لو كان مثلا جمال و علاء اتعوروا في ماتش الجزاير كان ممكن نقطع العلاقات معاهم و لا نعلن الحرب عليهم لكن علشان دول اتنين عساكر ملهمش لازمه يبقي في داهيه 3- بص الموضوع جه ازاي .. زين العابدين كلمه في التليفون قاله علشان خاطري افرج عن الولاد قاله عينيا .. مفيش لا اجراء رسمي ولا طلب ولا اعتذار و لا حاجه الموضوع كله كلمتين في التليفون كأن الشعوب دي كومبارس في فيلم تاريخي (طلعلي فرختين من القفص و النبي)

الاخوان بين الحمورية السياسية و قطيع الغنم الديموقراطي

و اخيرا اعلن الاخوان عن مشاركتهم في انتخابات مجلس الشعب و اللي لفت نظري هو
أن 98% من أعضاء مجلس الشورى العام للجماعة وافق على المشاركة فى الانتخابات
و ده معناه انهم حاجه من اتنين , اما انهم حمير سياسيا او انهم قطيع من الاغنام , فاي شخص بالغ السذاجه الساسيه يعرف ان هذه الانتخابات مزورة كالعادة و ان الهدف الرئيسي هو اخراج قوي المعارضه الحقيقيه من المجلس و استبدالها بالوفد و الغد (موديل موسي مصطفي موسي) و ما شابه , فلا توجد اي فائدة للمشاركة سوي المساهمه في اكمال المسرحية الديموقراطيه , فاذا كان 98 % من اعضاء مجلس الشوري لا يفهمون ذلك ( يبقي يروحوا يبيعوا سوبيا احسن) , اما الاحتمال الثاني انه التصويت اساسا محسوم من قبل , بمعني انه هناك توجيهات و تتبعها الاغلبية الساحقه كالقطيع مثل التجمعات السياسية سيئة السمعه ( اتحاد اشتراكي-لجنة شيوعية-حزب نازي - حزب وطني ) و تكون هذه هي الديموقراطيه الاخوانية . خسرتم كل شيء من المقاعد الي الاحترام الي البرادعي الي باقي اطياف المعارضه الجاده ( يظهر مشربتوش من ماء المرشد الطهور)

رايح الجامعه .. سلاحك معاك .. هيروينك في جيبك

الخبر عن طالب حصل بينه و بين سواق اتوبيس خلاف علي المرور في الطريق قام مطلع سلاح و ضرب نار علي زجاج الاوتوبيس, بعد القبض عليه تبين الاتي , انه طالب في اكاديمية المستقبل و راكب عربية مرسيدس و معاه سلاح مش مرخص و تذكرة هيروين , شيء جميل جدا يعني ده تعبير عن الطبقة المسيطرة دلوقتي :- تعليم خاص تحت شعار بفلوسنا و عربية مرسيدس لزوم المنظرة و سلاح علشان اللي ميعجبوش ديته رصاصه و هيروين لزوم المزاج , ده نموذج لطبقة جديده زي ابن كريازي اللي دهس ضابط الشرطه و هشام طلعت مصطفي و الشعار هوه فلوس و نفوذ ع القانون تدوس

شجع تزوير الزمالك او فساد الاهلي

اذا كنت زملكاوي و مكسوف من فضايح الزمالك و احكام المحاكم بالتزوير و الاتهامات بالفساد فمتزعلش, فشقيقك الاهلاوي بيشجع نادي قائم علي الفساد حاليا, يمكن مش بوضوح فساد الزمالك و ده بسبب السطوة الاعلامية لحسن حمدي , اول مظاهر الفساد هي جلوس حسن حمدي علي مقعد رئاسة الاهلي و مقعد رئاسة وكالة الاهرام للاعلان و ده طبعا بيديله مناعه من هجوم مؤسسة الاهرام او هجوم اصحاب المصالح مع الوكالة , ربما تقول انه لا يوجد تعارض بين المنصبين فارد عليك بواقعة هي شراء وكالة الاهرام لحقوق الاعلانات علي قناة الاهلي بعشرين مليون جنيه , بمعني ان وكالة الاهرام تحت رئاسة حسن حمدي تعاقدت مع قناة الاهلي التابعة لحسن حمدي اي نفس ما يحدث من الوزراء اصحاب الشركات عندما تمنح الوزارة اراضي مثلا لشركة الوزير , استغلال المنصب من اجل منفعه شخصية و تضارب مصالح, حتي النادي الذي تشجعه هو نموذج للفساد .. شجع و استمتع

موافق علي حرق القران بشرط

طبعا انا مش مع استفزاز المشاعر الدينية و اثارة النعرات الطائفية و العنصرية, لكن في نفس الوقت لو بصينا من وجهة النظر الاخري ,فهم يرون ان القران به ايات تحث علي قتال اصحاب الاديان الاخري و هذا صحيح , في هذه الحالة فهو يقوم بحرق الكتاب الذي يساهم في قتل ابناء ديانته ,ولكن الشرط هو ان يكون بامكان احد احراق التوارة فهي مليئة بالتحريض علي القتل و اعتبار غير اليهود حلال دمهم , اما ان نحرق الكتابين او لا نحرق

وحشية حماس و هذه البراءة الاسرائيليه

الخبر كان عن مقتل 4 مستوطنين علي يد كتائب مسلحه تابعه لحماس و من بينهم سيدة حامل, و السؤال هو باي حق يتم قتل سيدة و حامل ايا كانت الاسباب , سيقول البعض انها محتلة لارض الغير و السؤال هو هل يحق قتل من استولي علي املاكك , علي سبيل المثال اذا احتل احدهم بيتك هل يحق لك قتله و ما ذنب هذه السيدة في ان حكومتها او دينها يقولون ان هذه ارضهم و ان من حقهم العيش فيها, الحجة الثانية هي ان الاسرائليين يقتلون الفلسطينيين كل يوم عن طريق السلاح او الحصار, هل هذا مبرر لقتل مدنيين ليس لهم علاقة بالحرب و اذا كان كل هذا يبرر قتل السيدة و هي لم تفعل شيئا ماهو المنطق في قتل جنين في بطن امه هل يتم معاقبته و هو لم يأت الدنيا بعد , اذا كنا ندين وحشية الاسرائليين فلتكن لدينا الشجاعة و ندين وحشيتنا .

تحب تاخد 7000جنيه في يوم؟

مستشار نزل من بيتهم يوم الجمعه علشان يراقب علي امتحان لطالبي الالتحاق بالمحكمه , يا تري اخد كام في المهمه دي 7000 ج سبعة الاف جنيه فقط لا غير يعني لو مرتبك 700 جنيه يبقي ده مرتب عشر شهور يعني اليوم بتاعه ب 300 يوم من عندك و كل ده من مال الناس و بعد كده يكلموك عن ترشيد دعم الرغيف و انابيب البوتاجاز !