1/31/2010

عطور شرقية اندلسية

في المكتب الحكومي الذي اعمل به من الطبيعي جدا مرور الباعة الجائلين بمختلف انواع السلع.و في يوم من الايام ودخلت سيدة الي المكتب و معها بضاعتها اول ما لاحظته كان طريقة كلامها حيث كانت تتحدث العربية و لكن بلكنة غريبة ,في البداية ظننت انها صينية حيث اصبح من المعتاد وجود بائعات صينيات في كل مكان , و لكن شكلها لم يكن صينيا بالمرة كانت ملامحها اقرب للمصريين و جسدها سمين علي عكس الصينيين و بدأت في عرض بضاعنها من العطور علي الموظفات وفي اثناء الكلام افصحت لنا عن جنسيتها و هي انها من ام اسبانية و اب تركي مصري ! و في اثناء الحديث معنا تلقت مكالمة تليفونية و تحدثت فيها الاسبانية بطلاقة مما يؤكد صحة كلامها , الطريف انه بعد ان قامت الموظفة بالفرجة علي العطور قالت للبائعة انها لا تريد الشراء ففوجئت برد فعل البائعه التي اخبرتها بانها قد اضاعت وقتها و انها كان يجب ان تخبرها من البداية بذلك و غادرت المكتب وسط دهشة من فيه.

امسح الاقباط ب استيكة

فيه صفحة في اهرام الجمعة اسمها فكر ديني بتتعرض للقضايا الدينية الاسلامية ,الاسبوع ده كان عنوانها خطاب ديني للمسلمين و الاقباط ,اللي فهمته انها هتتكلم عن الخطاب الديني الاسلامي و المسيحي , الصفحة عبارة عن مقالات ل 8 علماء, انا قلت ممكن هيبقي نصهم مسلمين و النص مسيحيين او مثلا 6 من هنا و اتنين من هنا , النتيجة النهائية بقي ان العدد تمانية مسلمين و مفيش ولا مسيحي كأن الخطاب هوه الاسلامي و بس او كأنه حرام انك تجيب رأي مسيحي في صفحة دينية اسلامية و يرجعوا يقولوا مفيش تمييز و مفيش ما يدعو الاقباط للشكوي, النقطة هيه ان الدولة ب وشين الاولاني قصاد الاسلاميين بانها دولة مدنية و اساسها المواطنة و قدام الاقباط هيه دولة ذات مرجعية اسلامية و اخرة اللعب بالنار هي الحريق

جمال و علاء مبارك ع الحلوة و الحلوة

النهاردة علاء و جمال رايحين يحضروا نهائي كاس الامم الافريقية و كان اخر ماتش حضروه ماتش الجزاير اللي في السودان و اللي لاحظته انهم بيروحوا الماتشات اللي فيها توقع المكسب اكبر من توقع الهزيمه بدليل انهم ما راحوش ماتش الكاميرون او ماتش الجزاير الاخير و ده لانها ماتشات صعبه و مش مضمونة و لو هما قاصدين المسانده فعلا و بيحبوا المنتخب كانوا راحوا الماتشات الصعبه لكن واضح انه الغرض هوه الحصول علي شعبية و ركوب موجة الهوس الكروي واهو كله بيلعب علي كله

1/28/2010

من حقي ك راجل البس النقاب

من المواضيع اللي مازالت شاغلة الناس موضوع النقاب ، و قضايا قدام المحاكم و جدل في الفضائيات و الجرايد، فكرت في الموضوع بطريقة ماذا لو و هي بتعتمد علي انك تخلي القضية زي ما هيه و تغير عنصر واحد من العناصر ، علي سبيل المثال ، قضية النقاب ، نفترض ان واحد مثلا حب يرتدي النقاب ، مثلا بانه يبقي ملثم و يغطي وشه في الشارع تخيله مثلا لو ركب الاتوبيس الناس هتبصله بتوجس لو مشي في الشارع اي رجل امن هيعتبره خطر علي الامن و لما يدخل مكتبه في الشغل الناس هتعتبره مش طبيعي و مش هتعرف تتعامل مع الكائن الخفي ده ف لو النقاب ده حرية شخصية يبقي من حق الرجالة تلبس زيه و نبقي كلنا عايشين في مجتمع ملوش ملامح زي مجنمع الصحرا اللي استوردنا منه النقاب نستورد الوجوه الملثمة.

1/27/2010

سوزان هانم بتتكرم علينا من فلوسنا

خلال زيارتها محافظة أسوان أمس‏,‏ وفي استجابة فورية لمطالب المضارين من جراء السيول بالمحافظة‏,‏ أعلنت السيدة سوزان مبارك قرينة رئيس الجمهورية عن أنه سيتم زيادة المبالغ المخصصة لبناء المساكن‏,‏ التي تهدمت خلال السيول من‏25‏ ألف جنيه إلي‏80‏ ألف جنيه لكل منزل‏.‏
و السؤال بأي صفة اتخذت سوزان مبارك هذا القرار ,هل لديها اي صفة رسمية في الدولة, هل هناك منصب رسمي باسم(زوجة رئيس الجمهورية) . افهم مثلا ان تدعو مثلا رجال الاعمال للتبرع او حتي تتبرع هيه من اموالها لكنها تتصرف بمنطق انها من ملاك الدولة و اتها زوجة صاحب البلد و من حقها اعطاء اوامر للحكومة ف العملية في بيتها

1/25/2010

اقتل 100 و ادخل الجنة مجانا

من جريدة الاهرام الصادرة اليوم في صفحة الفكر الديني ,قصة بعنوان توبة قاتل المائة يرويها الدكتور محمد عبد العليم العدوي استاذ تاريخ اسلامي بجامعة الازهر عن رجل قتل 99 نفسا و اراد ان يتوب فاتجه الي راهب و ساله هل لي من توبة فقال :لا . فقتله فاكمل به المائة ثم سأل عن عالم اخر و قال له انه قتل 100 نفس هل من توبة؟ فقال نعم. انطلق الي ارض كذا فان بها اناسا يعبدون الله فاعبد الله معهم؛ فانطلق حتي وصل الي نصف الطريق اتاه الموت فاختصمت فيه ملائكة الرحمة وملائكة العذاب فقالت ملائكة الرحمة جاء تائبا مقبلا بقلبه لله تعالي و قالت ملائكة العذاب: انه لم يعمل خيرا قط ـ فاتاهم ملك في صورة ادمي فجعلوه بينهم حكما قيسوا بين الارضين فالي اينهما كان ادني فهو له (اي بين ارض المعصية التي تركها و ارض من يعبدون الله) فوجدوه ادني الي الارض التي اراد فقبضته ملائكة الرحمة فقال الحسن :ذكر لنا انه لما اتاه الموت نأي بصدره ,رواه مسلم و في رواية(فكان الي القرية الصالحة اقرب بشبر فجعل من اهلها) و في رواية اخري (فاوحي الله تعالي الي هذه ان تباعدي و الي هذه ان تقربي و قال:قيسوا ما بينهما فوجدوه الي هذه اقرب بشبر فغفر له)
عندي تعليقات كتير علي القصة العجيبة دي
- القصة علي لسان استاذ تاريخ اسلامي من جامعة الازهر يعني لا هوه واحد مجهول ولا جاهل دينيا ولا واحد وهابي او من بتوع الثعبان الاقرع.
- القصة ليها اكتر من نهاية ولو ان كل النهايات بنتيجة واحده و منهم رواية منسوبة لمسلم يعني القصة بالنسبة للمسلمين اللي بياخدوا باحاديث البخاري و مسلم كسلم بيها قصة حقيقية
-يعني واحد قاتل 99 شخص و كملهم بالعالم اللي راحله بقم 100 مجرد انه يقول انا تبت يبقي خلاص مش مهم ال 100 اللي قتلهم و العبرة بانه تاب ف الاخر
- المشهد الظريف جدا انه طلع لقي الملايكه بيتخانقوا عليه ده بتاعنا لا ده بتاعنا العملية هيصة فوق و كأنهم مصلحتين حكوميتين بيتخانقوا علي موظف جديد
- و بعديها الملاك اللي جالهم في صورة بشر علشان يحكم ف الموضوع قالك احنا نقيس المسافة بين البلدين و تشوف هوه اقرب لانهي كأنه حكم كورة و بيحسب ضربة جزار و هيشوفه جوه المنطقة ولا بره
- و في الاخر يطلع فرق شبر او فرق بصدره و يخش الجنة و توته توته فرغت الحدوته.

1/23/2010

حاجه تموت .. من الضحك

جت سيرة الموت و الدفن و القبور في المكتب و اليكم اهم ما قيل
- الميت بيسمع الناس اللي واقفة حوالين القبر و هما بيدفنوه و روحه بتكون في ودنه الشمال!
- الميت بينزل من السما للقبر كل اسبوع من يوم الخميس باليل لحد يوم السبت الصبح!
- لما بييجي يدفنوا الميت بيفكوا عنه اربطة الكفن علشان يعرف يقوم يقعد لما يحاسبه الملكين !

1/19/2010

مروة الشربيني و نجع حمادي بالعكس

فيه حاجات كتير محيرة ف الحياة و مش سهل انك توصل ل رأي فيها, بس انا باستخدم طريقة اعتقد انها مفيدة و هي انك تغير من مواقع الاشخاص او الاحداث بمعني انت مثلا هتاخد قرار في موضوع زي مروة الشربيني اللي قتلت في المانيا و عايز تعرف رد فعلنا طبيعي ولا مبالغ فيه . افترض ان مروة الشربيني هيه القاتلة و تخيل رد فعلنا هتكتشف قد ايه احنا بالغنا في تحميل الموضوع اكتر مما يحتمل. انا قمت بتطبيق النظرية دي في احداث نجع حمادي اللي الحكومة مصممة انه حادث جنائي مش طائفي و ان سببه اغتصاب الطفلة المسلمة بواسطة مسيحي و افترضت ان الحادث بين اسيوط و المنيا و انه واحد من اسيوط وقف وسط الشارع ف المنيا و ضرب نار بشكل عشوائي .هل نقدر ساعتها نقول ده حادث اجرامي او ثأر ولا ده يبقي عدوان علي طائفة من الناس

1/17/2010

عندما قالت المنقبة يا ابن الوسخة

بدلا من استخدام (الميني باص) قررت ان استقل اوتوبيس هيئة النقل العام حيث كانت المسرحية الغريبة .بدأت الاحداث بصعود منقبة الي الاتوبيس و قامت بسؤال السائق عن مكان معين و لكنه لم يجبها لانه كان مشغولا بعطل في المحرك .جلست المنقبة في المقعد الموجود امامي مباشرة و بدأت توجه عبارات تلوم فيها السائق بصوت عالي و بدأ السائق يرد عليها ثم قام راكب بتأنيب المنقبة ثم تطور الامر لتبادل الشتائم العادية ثم تطورت الي شتائم من نوع يا ابن الوسخة من الطرفين ثم تدخل راكب اخر متضامنا مع المنقبة و كاد ان يشتبك مع الراكب الاول لكن الناس منعته ثم بدأ الموضوع يهدأ قليلا حتي دخلت محجبة الي الحلبة لتهاجم المنفبة و يتابادلان الشتائم حيث قالت المحجبة للمنقبة انها (مش ست) و ردت عليها المنفبة بانها (ناتفة حواجبها) ثم شتمتها بانها بنت شر..
لا اعرف لماذا تذكرت القضايا المتبادلة بين وزارة التعليم العالي و المنقبات بخصوص دخول الامتحانات (هما دول اللي واجعين دماغنا علشانهم)

الانبا كيرلس شيخ قبيلة الاقباط

نقلا عن جريدة الاهرام ان الانبا كيرلس توجه الي اهالي فتاة فرشوط عقب وقوع حادث الاغتصاب وعرض عليهم اذا لم يأخذ القانون مجراه ضد المعتدي علي الفتاة فانه سيحضر الشاب المعتدي بنفسه لينتقموا منه كما يشاءون . شيء عجيب جدا الانبا كيرلس يتصرف كشيخ قبيلة هو الحاكم فيها و صاحب الكلمة الاولي و الاخيرة. بأي سلطة سيحضر المعتدي و بأي سلطه يسلمه لاهل الفتاة كأنه لا يوجد قانون و محكمة و عدالة و علينا ان نطبق القانون بايدينا و كيف يسلم الفتي لمن سوف يقوموا بقتله في الغالب . لقد تحولت الدولة الي قبائل متعددة بسبب غياب القانون و العدالة و الانتماء لشيء اسمه وطن به حقوق و واجبات و تحولنا لقبائل متعددة اقباط و نوبيون و بدو و هكذا حتي تتفكك الدولة تماما.

1/10/2010

مسلمون يحبون رائحة الدم المسيحي

في المكتب الحكومي الذي اعمل به يوجد 12 موظف و موظفة كلهم مسلمون باستشناء موظفة مسيحية لهذا يتجنب المسلمون التحدث في الامور الدينية في وجودها بينما في غيابها يكون المعتاد هو مهاجمة المسيحين و لهذا انتظرت بفارغ الصبر معرفة رأيهم في حادث نجع حمادي : حيث انتظرت الموظفتان خروج المسيحية لكي يتكلما في الموضوع حيث اعتبرا ان الهجوم جاء ردا علي قصة الشاب المسيحي و الفتاة المسلمة و جاء الحوار ك التالي
- شفتي اللي حصل ف الصعيد
= اه ماهو ده الموضوع بتاع الولد و البنت
- مكتوب فيه انه فيه 7 جثث
- احسن
=يستاهلوا

1/09/2010

هيفاء وهبي و الانبا كيرلس ..خلي الريس ينفعكم

و انا بقلب ف التليفزيون لقيت جزء من اغتية بالغة السذاجة بتغنيها هيفاء وهبي في حب مصر -تقريبا كتعويض للمصريين عن موقعة الجزائر - و في اخر الاغنية بتظهر صور رموز الشعب المصري و اكبر صورة هي للرئيس مبارك و بعديه سوزان مبارك ! بعد كده باتصفح جريدة الشروق لقيت ف الصفحة الاولي صورة للانبا كيرلس اسقف نجع حمادي اللي حصلت فيها المجزرة الطائفية و هو في مؤتمر صحفي بخصوص الحادث ؛ الصورة متاخدة بذكاء شديد بحيث يظهر الانبا و وراه الصليب الذهبي الكبير و علي يمينه صورة مبارك ؛ اللي يجمع الاتنين ان هيفاء و هبي عايزه تنافق الشعب المصري بادعاء الوطنية و نفاق الرئيس و اهي تبقي ارضت الشعب و الريس و جوزها المصري بالمره اما الانبا كيريلس ف برضه بيحاول انه يقول انه مع الرئيس بالرغم انه الحوادث الطائفية مستمرة من قبل تولي الرئيس ولا زالت مستمرة واما الناس اللي هوه بيهاجمهم زي المحافظ و الداخلية دول من اختيار الرئيس و تابعين ل امره ف بدل ما يعلن احتجاجه علي الرئيس و نظامه بيحتمي بيه و البابا يخطب ود ابنه و طول ما الحال كده هينقتل اقباط و هنتفرج علي هيفاء وهبي.

1/08/2010

ملابس داخلية في المصلحة الحكومية

من عجائب الوظيفة الحكومية موضوع الباعة الجائلين . في البداية اصبت بصدمة من الموضوع كيف يتحول مكان العمل الي ساحة للشراء و البيع و الفصال و لكن بعد فترة يصبح الامر معتادا و تجد له تفسيرات منطقية حيث انه هناك الكثير من اوقات الفراغ لدي الموظفين و في نفس الوقت فانه مورد رزق للباعة و اليكم قائمة بانواع السلع التي تباع في المكاتب (من الابرة للصاروخ) كروت موبايل و اطقم كبايات و اطقم حلل و بسكوت و كابتشينو و نسكافيه و اطقم ملابس رياضية و ايشاربات و شرابات و عبايات و ورق الومنيوم و بطاريات و ساعات ودهب صيني و بهارات و كركديه و اقلام جاف و معجون اسنان و باديهات و احذية و اللي عاوزه تقيس في الطرقة و اضف الي ذلك المتسولين و مسك الختام ملابس داخلية نسائية و سلملي ع الميري.

1/06/2010

حتي بنات الليل بيقولوا يا رب

في مذكرات الدكتور نجيب محفوظ في اوائل القرن العشرين واقعة غريبة حيث تكليفه بالعمل في مكتب صحة باب الشعرية و في يوم من الايام تلقي امرا من المصلحة بان يتولي معاينة محل بوظه تمهيدا للترخيص بان يزاول عمله و كان محل البوظة في حي الواسعه و هو المكان المخصص للمومسات و بعد ان وصل للمنزل الذي به المحل استقبله رجلان و اخبراه بان يقابل (العايقة) و هي السيدة الني تدير النشاط الخاص بالمومسات و عندما دخل الي الشقة و اتجه الي باب غرفتها رأي مكتوبا عليه (و زيناها للناظرين) و بعدها تزلوا الي البوظة بالاسفل و اثناء تجولهم بها رأي دولابا مغلقا و اراد ان يفتحه و لكنها طلبت منه اذن نيابة و كان مكتوبا علي الدولاب (و ما ننزله الا بقدر معلوم ) و كان الاغلب ان هذا الدولاب كان مستودع لانواع المخدرات من الحشيش و الافيون

1/05/2010

حد بيعرف يرسم كاريكاتير ؟

هيه فكرة ل كاريكاتير بس مع الاسف مبعرفش ارسم هيه عن يسري الجمل اللي طلع من الوزارة في نفس يوم ماتطعم قدام الكاميرات . الكاريكاتير هوه عبارة عن اتنين بيتكلموا و تحتيهم عبارة اقالة وزير التعليم وواحد بيقول التاني .. وقال بيقولك التطعيم مالوش اثار جانبية

1/04/2010

ماء زمزم بيجيب الكوليرا

في مذكرات الطبيب نجيب محفوظ و هو طبيب نساء و توليد و كان الاشهر في زمانه و هو الذي قام بتوليد والدة الاديب نجيب محفوظ و قد عبرت عن امتنناها له بان سمت ابنها علي اسمه المثير الاهتمام هو في سنة 1902 كان وباء الكوليرا منتشر في القري المصرية و عندما توجه اليها د. نجيب محفوظ اكتشف سبب انتشار المرض في هذه القرية وهو احد الحجاج العائدين من مكة كان قد جلب معه 10 صفائح من ماء زمزم .
من المعلومات الطريفة ايضا في هذه المذكرات ان بها صحة مثل شعبي كان يحيرني كثيرا و هو ابعد عن الشر و غني له باعتباره مثل غير منطقي اما صحته فهي ابعد عن الشر و قني له بمعني انك تعمله قناة يمر فيها بعيد عنك.

اضحك مع الشعب

نكتتين من الواقع المصري
الاولانية واحد معاه ليسانس اداب و كان صحفي بيتدرب في جريدة قومية فسر نوبة البرد اللي جاتله لمدة يومين بانه اكل كتير من التورته اللي عملتها اخته!
التانيه واحد عنده 38 سنة مقدم و مهندس ف الجيش حب يخطب واحدة عن طريق جواز الصالونات كان مشترط ان مامته تيجي تشوف العروسه بتفسها ف الاول من غير ميكون موجود زي فيلم ماري منيب و لبني عبد العزيز

1/03/2010

خير اللهم اجعله خير يسوع ناداني

كنت راكب العربية مع صاحبي رايحين نستلم الارض اللي خدناها في مشروع ابني بيتك و اللي مساحتها ميه و خمسين متر وكنا معتقدين ان المساحة دي ثابته لكل الناس و بعدين لقيت صاحبي بيقوللي انا حلمت امبارح باننا استلمنا الارض و مساحتها 178 متر ماديتش اهمية للموضوع انا مش باصدق في الاحلام و التنبؤات و كده بعد شوية وصلنا للمدينة و رحت للجنة اللي بتسلم الاراضي و بعد ماعملنا الاجراءات لقيت الموظف بيقوللي انت حظك حلو جدا مساحة الارض بتاعتك 178متر فحسيت اني بحلم و انه يبدو ان فيه حاجات غير طبيعية في الحياة.
تاني حكاية:- كنت عند دكتور بس هوه من النوع اللي بيتأخر قوي طلعت من عنده الساعة 3 الصبح ووصلت بيتنا الساعة 4 قبل ما اوصل ب 5 دقايق وانا بعدي الشارع سمعت صوت حد بيغني او بيقول تراتيل كان صوته جميل جدا مش فاكر من اللي قاله غير كلمة يا يسوع قعدت ابص علي مصدر الصوت مشوفتش حد بس كنت حاسس بحالة نشوة جميلة.

1/01/2010

مسيحي يقهر المرأة بالقران

الخبر في الاهرام عن زوج و زوجه منفصلين و عندهم بنت عمرها12 سنة بتدرس في مدرسة تجريبي و قامت والدتها بالتقديم للبنت في تفس المدرسة في قسم الثانوي لكن الاب بقي عايز يحول بنته لمدرسة ازهر لغات ف راح رفع قضية و كسبها برغم ان قانون الطفل بيدي الست الحق ده। و الطريف ان القاضي قال انه ده تطبيقا للشريعة الاسلامية و القاضي نفسه مسيحي اللي محيرني ازاي يتم اجبار طفلة علي تغيير نوع تعليمها بالعافية و تاني حاجه هوه ازاي قاضي مسيحي بيحكم بالشريعه وهو اصلا مش مقتنع بيها و فيه بعض القضاة المسلمين بيستشهدوا بايات قرانية و ساعتها المسيحي يستشهد بكتاب مش مقتنع بيه ولا يستشهد بالانجيل।