برامج رمضان 2011 ..اتنين فلول بيفلوا بعض

من الغريب في برامج تليفزيون رمضان السنه دي انه بدل ما كان مثلا انه يتم استضافة الشباب و الناس اللي غيرت مصر سواء علشان نعرفهم او علشان نكرمهم او نشكرهم و نعرف افكارهم الاقي انه معظم ضيوف البرامج هما انصار النظام السابق زي صابرين و تامر امين و طلعت زكريا و طلعت السادات و مرتضي منصور و غيرهم كتير و الادهي انه اللي بيحاورهم هما من انصار النظام السابق زي لميس الحديدي و خيري رمضان و تامر عبد المنعم و ريهام سعيد , كأن وظيفة برامج رمضان السنه دي هي عملية غسيل سمعة للفلول بتوع النظام السابق و اننا نتعود علي وجودهم و استمرارهم معانا , و ده ملوش عندي غير تفسير من اتنين الاولاني حسن النية انه الاعلام بيدور علي لفت الانتباه و الاثارة فعلشان كده بيستضيف الناس دي علشان نستمتع اننا نتفرج عليهم و هما بيواجهوا الاتهامات او الاحتمال التاني اللي انا اميل ليه خصوصا مع وجود خلفية عن تمويل و اصحاب القنوات دي اللي كانوا هما كمان من انصار النظام السابق , انه اللي بيحصل ده محاولة لانه المواضيع ترجع زي ما كانت و نرجع اعلاميا لتامر امين و لميس الحديدي و خيري رمضان و نستضيف مرتضي منصور و طلعت السادات يكلمونا في السياسة و يسرا و الهام شاهين في الفن و يا دار ما دخلك ثورة