"في تقارير بتتكلم عن ان مصر ساهمت في تأجيج الحرب الاهلية اللي اثيوبيا داخلها فيها، وانها عملت ده عن طريق تسليح المعارضين، بمباركه من ترامب اللي دعم الموقف المصري في ملف سد النهضة، مره لما وقف المساعدات المالية لاديس ابابا، ومره لما صرح ان مصر مش حتسكت والسد ممكن تفجره. عموما (لو فرضنا) ان الكلام ده صح فده في حد ذاتها مش حل للأزمة، انت بس شوطت الكوره بعيد وكسبت وقت، لكن كده كده السد بقى حقيقة واتنفذ منه اكتر من 60% خلاص، وعاجلا او اجلا الحرب هتخلص وحنرجع تاني لنفس المربع. لكن "لو" ده كان بيتم في إطار سياسة لوي الدراع، وانت عندك قدره فعلا تلمها بعد كده ولو نسبيا، بمنطق "سيب وانا اسيب" وخلينا نقعد نتفق اتفاق عادل ومريح للجميع، فيبقى الله ينور يا رجاله."الكلام ده كتبه صحفي مشهور المفروض انه معارض وليبرالي وليه عشرات الالاف من المتابعين، بغض النظر عن صحة الفرضية فاحنا قدام كذا مشكلة في آخر فقرة
أولا هو معندوش اننا نشعلل حرب أهلية هيموت فيها مدنيين علشان مصلحتنا ، ممكن يقول ان السياسة مفيهاش مباديء انسانية واللي تغلب به العب به، تمام بس ساعتها يبقى زيك زي دول الاحتلال اللي بتقتل أبرياء علشان مصالحها وزي الجماعات الارهابية اللي بتقتل مدنيين علشان تحقق مصالحها،ولو حد مثلا يشعل حرب طائفية في مصر علشان مصالحه المفروض مش هارفض الموضوع بدافع أخلاقي ومأقولش دي مؤامرة خسيسة وتمويل خارجي وأتقبله كلعبة سياسة وبس ،وطبعا موضوع الغاية تبرر الوسيلة معروف ممكن يوصل بينا لحد فين في تبرير أي جرائم من ضرب الشعب بالكيماوي وصولا للمذابح الجماعية
.
- ثانيا الموضوع لا يخلو من عنصرية ،ماعتقدش انه ده هيكون نفس رأيه لو شعللنا حرب أهلية في سوريا أو لبنان أو العراق أو فرنسا،ساعتها هيبقى دول أبرياء ملهمش ذنب وشكلهم يقطع القلب وهما بيموتوا بعض ، لكن أثيوبيا عادي دول أفارقة وأصلا بيموتوا ، ،بعض فمجاتش علينا احنا.
لأن طبعا الانسان الافريقي الأسمر ده درجة تانية أو تالتة بعدينا وكلنا بعد الانسان الأبيض
أما ثالثا وهوده اللي حصل، ايه هيبقى موقفنا لما نفشل في اسقاط النظام الأثيوبي ويكتشف الشعب هناك اننا كنا بندعم حرب أهلية عندهم علشان يقتلوا بعض ، طبعا هيكون فيه كراهية ضدنا وضد مصالحنا ، وساعتها هنسأل ليه بيكرهونا ده احنا طيبين
#الله_ينور_يا_رجالة
