رفعت السعيد يولد من جديد

في التسعينات و مع تصاعد موجة ارهاب الجماعات الاسلامية  كان قدام الصحفيين و السياسيين و الفكرين اكتر من موقف

-انك تاخد موقف متعاطف مع الجماعات الاسلامية ..طبعا مش هتقدر تدعم العنف او الارهاب بشكل واضح بس هتاخد صفهم و هتهاجم العلمانيين و الحكومة بشكل دائم و ده كان بيمثله جرنال (الشعب) و رئيس تحريره مجدي احمد حسن

- انك تمسك العصاية من النص  و تحاول متزعلش دول او دول

- انك تاخد صف الحكومة و مش بس تهاجم الاسلاميين و الجماعات الاسلامية ..لاء تتحول لمدافع عن النظام بالحق و الباطل و مهاجم للمعارضة ايا كانت اسلامية او غير اسلامية  و مدافع عن امن الدولة و تخلي الحكومة تعينك او تزولك في الانتخابات و ده كان ولا يزال يمثله "رفعت السعيد"

- انك تكون ضد  ارهاب الجماعات الاسلامية و بقوة بس في نفس الوقت ضد  النظام و فساده و دي كانت تجربة ابراهيم عيسي في جرنال الدستور "الاصدار الاول" اللي برغم انه كان  ضد الجماعات الاسلامية الا ان جرناله اتقفل بقرار حكومي لما شافت الحكومة انه بقي معارضة مزعجة بالنسباله

عزيزي المعادي للاسلاميين حاليا مفيش مشكلة انك تكون ضدهم علي طول الخط بس متتحولش لرفعت السعيد اللي هيحب النظام و يتغاضي عن مصايبه .. و يتحول لتابع ليه

10 خطوات لصنع و تكوين الفاشية المصرية

وزير دفاع بيعزل رئيس جمهورية

خطاب موحد لوسائل الاعلام ووسائل الاعلام اللي عكس الموقف ده اتقفلت

القبض علي قيادات من تيار معين

قصص كاذبة عن اغتيالات 

تأليه للجيش المصري و عدم محاسبته علي  او التحقيق معاه في مقتل عشرات المصريين

خطاب تحريضي ضد جنسيات تانية زي الفلسطينيين و السوريين

دعوات لقتل او نزع الجنسية او عزل كل من ينتمي للتيار الاسلامي عن المجتمع

محاولة الايحاء  للمصريين بوجود معركة كرامة وطنية و استقلال ضد امريكا و زي كل مرة هتنتهي علي مفيش هيفضل الجيش المصري ياخد المليارات من امريكا

تعتيم اعلامي   بخصوص اعتصامات و مظاهرات التيارات الاسلامية

التعامل بعدم اهتمام مع احداث العنف التي يقوم بها اسلاميين  في مناطق من مصر (مطروح - اسيوط -سيناء) لاظهار ان البلد في حالة من الاستقرار و انها احداث صغيرة غير مؤثرة

1. 
   

يوميات مكتب

 شاءت الظروف ان اداوم علي العمل في

 مكتب حكومي يوميا لمدة تجاوزت الخمس سنوات

 حتي الان، وهنا دارت جميع الاحداث المنشورة 

في هذه المدونة وهنا يجب التنويه علي ان جميع 

شخصيات والاحداث حقيقية ١٠٠٪ ولم اقم بالتعديل

 او التدخل مطلقا في جميع 

التفاصيل

http://mowazafen.blogspot.com/

مدونتي  "يوميات مكتب " عن  مشاهداتي و حكايات الموظفين 

الهام شاهين تنتقم من الاسلاميين علي طريقة سلاموني الكلب

"بدوره قال الكاتب صلاح عيسى إن «أدب التلسين» الذي نحت مصطلحه الناقد الكبير فاروق عبد القادر يتجه فيه المبدعون إلى تصفية حساباتهم الشخصية مع خصومهم، ويستدعون فيه شخصيات عامة أو أدبية بهدف إثارة فضول القارئ إلى التلصص على الآخرين. وبحسب عيسى فإن الظاهرة تمتد إلى كل الفنون خاصة السينما والرواية والشعر، وضرب مثلا بالمخرج الراحل حسام الدين مصطفى الذي ضاق ذرعا بكتابات الناقد الكبير الراحل سامي السلاموني، فقدم شخصية في أحد أفلامه تحمل اسم السلاموني، يضربها كل من في الفيلم على «القفا» بل ويسخرون منها طوال الأحداث."

حسام الدين مصطفي عمل فيلم و  عمل فيه شخصية اسمها سلاموني و طول الفيلم  الابطال بيضربوها و يشتموها يا سلاموني الكلب

الهام شاهين عاملة مسلسل " نظرية الجوافة " علشان تنتقم من التيار الاسلامي  و تتريق علي مرسي باستخدام ايفيهات باسم يوسف  بسبب قضية عبد الله بدر

اييييه  دنيا 

مبارك و عمرو دياب (3-3)

ينتمي مبارك لمحافظة المنوفية التي اشتهرت بطموح ابنائها و رغبتهم في الصعود للسلطة ولاعلي المناصب و يضيف البعض صفات مثل النفاق و الوصولية و الاستعداد للتضحية بأي شخص من اجل الوصول للهدف .

ينتمي عمرو دياب لمحافظة بورسعيد  التي نظرا لكونها محافظة ساحلية علي ضفاف قناة السويس اشتهرت بالتجارة , و اشتهر اهلها بكونهم تجارا مهرة و اصحاب طموح تجاري كبير , مما يتطلب توافر مهارات الذكاء الاجتماعي و القدرة علي الحصول علي المال من اسهل الطرق

كان مبارك ظابطا مجتهدا طموحا  يقضي الاجازات في الكلية ولا تسترعي انتباهه ايا من نزوات الشباب التي تمثل بالنسبة له عائقا عن طموحه الدائم في التفوق و قد اوصله ذلك لمنصب عميد كلية الطيران ثم لمنصب قائد القوات الجوية  ثم نائب رئيس الجمهورية ثم رئيسا للجمهورية

عمرو دياب المغني الاكثر طموحا في جيله و ربما الاكثر طموحا عبر كل اجيال المطربين المصريين .. كثيرا ما تكتشتف أن الكثير من  الاجانب المهتمين بالاغاني العربية لا يعرفون سوي عمرو دياب  , يتكلم من عملوا مع عمرو دياب عن اهتمامه الشديد بعمله و أنه يواصل العمل في الاستوديو لمدة 16 ساعة يوميا اثناء الاعداد لالبومه

علي الرغم من كل الاتهامات التي وجهت لمبارك من فساد مالي و ديكتاتورية الا انه لم يكن هناك اتهام حقيقي له بوجود علاقات نسائية في حياته الا بعض الشائعات الساذجة (اخت عبد المنعم عماره او ايمان الطوخي ) , ربما يرجع ذلك البعض الي شخصية سوزان المتسلطة او القوية و لكني اعتقد أن السبب الحقيقي هو عدم السماح لشيء أن يؤثر علي مسيرة الطموح التي لا تنتهي

كان عمرو دياب ولا يزال رمزا للرجل الجذاب و بالرغم من أن لا أحد تقريبا في مصر يسلم من شائعات عن علاقات نسائية الا أن عمرو دياب  كانت الشائعات بخصوص علاقاته قليلة جدا ( شائعة واحدة التي اتذكرها  و كانت بسبب فيلم ايس كريم في جليم) و قد خاض  عمروتجربة زواج غير ناجحة مع شيرين رضا ثم كانت التجربة الثانية مع زوجته السعودية التي استمرت بنجاح حتي الان .. حيث أنه لن يسمح لشيء اخر أن يعوق مسيرة نجاحه

كان مبارك محبا لممارسة  الرياضة (لعب الاسكواش مثلا)  و لمشاهدة الرياضات الاخري خاصة كرة القدم (تكريم المنتخبات و زيارتها و  الحديث معهم تليفونيا) , و في نفس الوقت كان مبارك كارها للقراءة و لمن يقرأون ..( كان يسخر من سوزان و من كتبها اثناء استكمالها لدراستها العليا ) و معتبر أن من يقرأون هم مجرد اناس لا يقدرون علي مجابهة الحياة الواقعية مثله .

يهتم عمرو دياب بالرياضة  فهي هوايته المفضلة فيما يبدو فبالاضافة لكونها وسيلة جيدة لحفاظه علي صحته و سلامة جسده و احتفاظه بقدراته الغنائية , فهي تعمل علي احتفاظه بمظهر شاب حتي الان مما يجعله منافسا من حيث المظهر لشباب يصغرونه ب 30 عاما , و في نفي الوقت لم تظهر اي دلائل لكون عمرو دياب مهتما بالقراءة بأي شكل من الاشكال , حتي "ايس كريم في جليم" الفيلم الوحيد الذي يعتبره الكثيرون هو و اغانيه معبرين عن حالة معبرة عن صعلكة حقيقية بطعم يساري (محمد المنسي قنديل و مدحت العدل و خيري بشارة) يبدو واضحا أن عمرو دياب لا يفهم او يهتم بأن يدرك هذه الابعاد فاهتمامه بسماع اغاني البوب الغربية و مبارايات الكرة العالمية لا يصاحبه اهتمام بقراءة او فكر او حتي الاستماع لموسيقات مختلفة عن السائد تجاريا .

كان طموح مبارك  بأن يصبح  صاحب اطول فترة حكم مثل محمد علي  و أن يورث السلطة لاولاده سببا في وصوله للسجن , كان عمرو دياب من الذكاء بأن يصمت تماما اثناء الثورة  ثم بأن يغني اغنية لشهداء الثورة تمشيا مع الاجواء ليعود بعدها لاغانيه العادية مستمرا في مشواره الفني

السادات و احمد عدوية (2-3)

الانفتاح و تشجيع القطاع الخاص كانا شعار السبعينيات  او كما قال السادات (اللي مش هيغتني في عهدي مش هيغتني  ابدا)  الضوء الاخضر للمرحلة الثانية من الحراك الاجتماعي بعد 1952 , كانت المرحلة الاولي في عهد عبد الناصر  معتمدة علي اعادة توزيع الاراضي الزراعية (الفلاحين) , بناء مصانع جديدة (العمال) , مجانية التعليم الجامعي و التوسع في الوظائف الحكومية (الطبقة الوسطي) , اما في عهد السادات فكانت القاعدة هي " فتح الابواب لمن يستطيع" و كاانت اول الابواب المفتوحة هي ابواب السفر للخليج  و كان من اهم ما يعود به المصرين "المروحة و الكاسيت" , الكاسيت هو أن تختار ما تسمع و أن تدفع مقابل شريط الكاسيت من جيبك , أن لا تتبع مزاج الدولة الغنائي الموجود في الاذاعة و التليفزيون , و اختار جمهور الكاسيت في السبعينيات "احمد عدوية " المغني الشعبي , و برغم ما كان يقوله نظام عبد الناصر عن انحيازه للطبقة الاكثر فقرا من الشعب الا انه كان يتعامل مع المغنيين الشعبيين علي انهم في درجة اقل من  المطربين العاطفيين .. و كانت التجربة الوحيدة التي كادت أن تكسر هذه القاعدة هي تجربة محمد رشدي و لكن عبد الحيلم بدهائه قام بمحاربته ثم قام بالتعاون مع جناحي نجاحه (الابنودي و بليغ حمدي) ليقدم هو الغناء الشعبي "المتطور" من وجهة نظره  و كان ذلك ممكنا في عصر الاذاعة , و لكن  الانتقام الشعبي جاء عبر عدوية الذي انتصر علي عبد الحليم عن طريق الكاسيت  ليعلن عن ديموقراطية الكاسيت , حيث كان السادات يدعو ايضا الي ديموقراطية ولكنها ذات انياب - للمصادفة  قام عدوية بالتمثيل في فيلم (انياب ) للمخرج محمد شبل حيث كان عدوية رمزا للتجار المستغلين للانفتاح في غرز انيابهم في رقبة الطبقة الوسطي (علي الحجار و مني جبر)  - كان حادث المنصة هو النهاية المأساوية للسادات عن طريق الجماعات الدينية المتشددة التي قام بتشجيعها , و كانت النهاية المأساوية لعدوية (صحيا) هي الحادث الذي تعرض له في أحد الفنادق  عن طريق امير خليجي ..  الخليج الذي  استطاع عن طريقه المصريون الحصول علي جهاز الكاسيت الذي صنع مجد عدوية  , بعد وفاة السادات باعوام طويلة بدأ البعض في اعادة النظر في سياسته خاصة المتعلقة بالسلام مع اسرائيل و في اعتبارها خطوة شجاعة لم يفهمومها في حينها , و بعد حادث عدوية بسنوات بدأ الكثير ممن كانوا يعتبرونه رمزا للغناء الهابط في اعادة النظر في اغانيه و اعتبارها تجربة حقيقية معبرة عن الطبقات الشعبية في مصر

عبد الناصر و السادات و مبارك او عبد الحليم و عدوية و عمرو دياب ..محاولة لفهم السياسة عن طريق الغناء (1-3)

                                        عبد الحليم حافظ

هو مطرب ثورة 52 .. الفلاح الشرقاوي القادم من ملجأ الايتام (محاربة الفقر) الذي درس الاوبوا في معهد الموسيقي (تشجيع العلم) و الذي لم يظهر الا بعد 52 فليس له ماض متعلق بمدح الملكية (الجمهورية الاولي) و في نفس الوقت هو المجدد في الموسيقي عن طريق استخدام توزيعات جديدة و حديثة  لموزعين مثل اندريا رايدر و علي اسماعيل .. (المزج بين الحداثة الغربية  و الهوية العربية او الوطنية) ..  المخلص للنظام دائما  و المعتمد علي النظام في أن يساعده في المقابل أن يقوم بالترويج له عن طريق الوسيلة الاكبر و الاهم للوصل للناس (الاذاعة) .. مع  قيام عبد الحليم بتكوين شركة "صوت الفن" بالمشاركة مع عبد الوهاب و مجدي العمروسي  كوسيلة لتحويل المكاسب التي يجنيها من دعم النظام له في الاذاعة و الصحافة المملوكين للدولة الي  مكاسب مادية عن طريق الاسطوانات و الافلام اللذان تنتجهما الشركة ( محاولة الرأسمالية للاستفادة من الدولة الاشتراكية في حدود القيود الموجودة ) .. الاخلاص للنظام مادام مستمرا حتي بعد هزيمة 67 .. ثم محاولة التودد الي النظام الجديد علي استحياء (اغنية عاش اللي قال )  و التودد الي الجماهير بشكل يختلف عن ذي قبل ربما يشتمل استخدام القبلات و المايوهات (فيلم ابي فوق الشجرة)  في بداية السبعينيات .. ثم التودد اليها في شكل معاكس (الادعية الدينية في النصف الثاني من السبعينيات) مع وضوح شعارات الشريعة الاسلامية و الرئيس المؤمن 

قريبا ..حل جمعية و جماعة الاخوان في عهد الرئيس مرسي ..

انا شايف ان اشهار جمعية الاخوان المسلمين هو اكبر فخ وقع فيه الاخوان علي عكس ما الناس شايفه ..كالعاده قعد الاخوان يتجاهلوا مطالبات تقنين وضعهم علي طريقة الطناش اللي بيتبعوها في كل مشكلة و بعدين مرة واحدة يلاقوا نفسهم اتزنقوا يقوموا معالجين المشكلة بطريقة الهروب للامام اللي غالبا يتوقعهم في مشكلة اكبر (زي الاعلان الدستوري مثلا) .. فلما سمعوا عن تقرير حل الجماعة قاموا قفزوا للأمام علي طريقة نسجل الجمعية في 24 ساعة و نبقي ضحكنا عليهم .. الفكرة انه كده الاخوان دخلوا برجلهم في مصيدة قانون الجمعيات الاهلية اللي كانوا عاوزين يحطوا فيه قيود علي قد ما يقدروا من اول عدم اشتغالها بالسياسة للتضييق علي التمويل .. بكده بقي عندك كارت سهل جدا في الاستخدام انه يطلع واحد بس من الجمعية دي يمارس نشاط سياسي ..ترفع قضية بحل الجمعية لمخالفتها القانون   و  تقفلها بالقانون و تدخل مرسي التاريخ بانه الرئيس الاخواني اللي اتحلت" جمعية " الاخوان في عهده  .. زي ما مبارك ساهم في اسقاط نظامه الاخوان برضوا بيساعدوا بنفسهم  في القضاء علي نفسهم

خيرت الشاطر مهندس النهضة فاشل في ادارة سوبر ماركت

مع الانتشار السرطاني لسلسلة سوبر ماركت (زاد) ..كان نصيبنا منها في المنطقة المحيطة بالبيت 3 منهم .. اول ما ابتدي حسيت انه مفتوح باستعجال و البضاعه مش كامله  و مع وجود منافسين كتير ليه مصادفش اني دخلته , النهارده و انا راجع البيت قولت ادخا اخد فكرة اشوف وصل ل ايه .. و  في نفس الوقت انا مش مع فكرة المقاطعة الاقتصادية للتجارة الاخوانية لانها في النهاية بتساهم في تشغيل مواطنين مصريين , دخلت السوبر ماركت ما لقتش حاجه مميزة ممكن اجيبها فاشتريت باكتات نيسكافيه و كيك و بسكويت ..كان تمنهم 6 جنيه و نص ..مكانش معايا فكة فاديت اللي علي الكاشير 100 جنيه فلقيته بيقولي ..مفيش فكة ..قولتله و انا برضه ممعايش فكة ..فضل متنح كده ..فقولتله خلاص و مشيت و سبت الحاجات .. انا عمري ما دخلت سوبر ماركت و شوفتهم بيرجعوا زبون علشان مفيش فكة ..دايما بتلاقي عند الكاشير كل فئات الفلوس  لانه المفترض انك تكون جاهز بالفكة .. حسيت انه الموقف ده هو ملخص اللي عمله الاخوان و الشاطر ..اول ما لقي انه فيه فرصة .. فتح فروع كتيرة بدون دراسة و بدون استعداد ل (زاد) مفيش تخطيط ولا تنظيم للشغل .. الموضوع كله فكرة يلا بسرعة يلا نلحق ..و بعدين نبقي نفكر .. اذا كنت يا باشمهندس مش عارف تحط خطة و نظام للسوبر ماركت بتاعك يطبقه الناس اللي شغالين فيه .. تفتكر هتفلح تعمل خطة للبلد !

مظاهرات من انتاج السبكي

في عام 2006 كان الظهور الاكبر و الأوضح لظاهرة التحرش الجماعي  في فيلم من انتاج افلام السبكي و بطولة الراقصة دينا و المغني سعد الصغير  لتتحول هذة الظاهرة الي ملمح اساسي في الاعياد المصرية لتضاف الي التحرش الفردي او الذي يقوم به عدد محدود من الاشخاص و هي الظاهرة اليومية في مصر .

بعد 25 يناير 2011 و في ظل اجواء القلق و التوتر الامني و في ظل الصعود غير المسبوق للاسلاميين الذي نتج عنه في ما بعد حصولهم علي ما يقرب من 70% من مقاعد البرلمان الاول بعد الثورة , فوجيء الجميع  بتصدر فيلم  "شارع الهرم " للايرادات في اول عيد بعد الثورة و تحطيمه للرقم القياسي للايرادات اليومية للافلام العربية و كان الفيلم من انتاج "السبكي" و بطولة دينا و سعد الصغير

اعتقد البعض أن ذلك مؤشر لرفض قطاع من الشعب المصري للقيود المحتمل فرضها من التيار الاسلامي علي الحياة الاجتماعية و الفنية في مصر  و لكن  نتائج انتخابات مجلس الشعب اوضحت أن من يتابع افلام السبكي اما انه قد اعطي صوته الانتخابي للاسلاميين في ظل شيزوفرانيا العقل المصري , او انهم لا يذهبون للانتخابات من الاساس .

في عيد الاضحي  2012  كان التغيير  هذه المره في تصدر فيلم (عبده موته) للايرادات في العيد بل و في العام باكمله و الفيلم من بطولة (محمد رمضان) و (دينا) و من انتاج (السبكي)

و في يناير 2013 كانت الاحتجاجات علي حكم الاخوان قد دخلت مرحلة من العنف  باستخدام عدد من المتظاهرين لزجاجات المولوتوف  و في نفس الوقت وجود حكايات مفزعة عن تحرش جماعي بشكل كبير و موسع في بعض المناطق المحيطه بميدان التحرير

يري بعض المعارضين أن علينا اتباع الشارع حتي و لو استخدم العنف , فهم مؤمنون بوجود اسباب قوية لهذا العنف .. و أري ان البعض عندما يبرر انطلاق غريزة العنف في المظاهرات بدون اسباب او ضوابط فانه لن يستطيع منع انطلاق حيوانية غرائز المتحرش الذي يطلق لنفسه العنان في كلتا الحالتين .. بينما يبدو أن اكثر من يفهم جمهور الشارع هو السبكي الذي يداعب غرائزه و يحصل علي امواله بينما قد يقود اتباع بعض السياسيين للشارع الغير عاقل لوقوفهم مع السبكي في تملق الشارع .

ممدوح حمزة هو اللي ورا البلاك بلوك (من شاهد عيان)

المره دي انا واخد الكلام بجد و ده لسببين اولا انها شهادة مباشرة لحد بيقول انه شاف بعينه ثانيا لاني شايف الكلام منطقي جدا

بعد ما حكا زميلي عن مسيرة يوم الجمعه اللي كانت من شبرا و انه شاف احمد ابو دومه و جيهان فاضل و ابوه اللي عنده القلب اللي مشي في النص علشان تعب

  : انا هاقولكم مين اللي ورا البلاك بلوك دول اللي وراهم هو ممدوح حمزة .. انا شفته و هو بيديهم تعليمات و هما بيامنوا مسيرة شبرا ووقت ما كان بيديهم التعليمات كانوا بيمنعوا ان اي حد يصور

ملحوظة : زميلي مؤيد للبلاك بلوك و شايف انهم بيحرقوا المؤسسات اللي الاخوان استولوا عليها و ان ده صح

نعم لدستور يخلي العجلة تدور فوق رقبتك

نعم لدستور  يخلي اي مدني ممكن يتحاكم عسكريا

نعم لدستور بيدعمه رئيس بيعين نائب عام بينقل رئيس النيابة اللي ميمشيش كلام الريس

نعم لدستور بيدعمه القتلة و الغوغائيين و الكدابين (الزمر و عبد الله بدر و صفوت حجازي)

نعم لدستور بينصبوا باسم الشريعة علشان الناس توافق عليه

نعم لدستور مبيكفلش خدمات صحية لكل المواطنين

نعم لدستور هيفتح علينا باب انه اي قانون هيعترض عليه واحد سلفي هيروح لمجموعة  من رجال الدين و هما اللي يتحكموا في مصير البلد

نعم لدستور بيسمح بعمالة الاطفال و تشغيل الكبار رغما عنهم

نعم لدستور بيتعمل فيه مجلس شوري يتصرف عليه ملايين و يعين رئيس الجمهوريه عشره  بينما كل العاقلين قالوا انه كفاية مجلس نيابي واحد

نعم لدستور بيسمح باعتقالك لمدة 12 ساعة 

نعم لدستور بيفتح الباب لجماعات انها تحافظ علي الاخلاق بنفسها باعتبارها من المجتمع 

نعم لدستور يخلي العجلة تدور بالعكس و بالعك 

خليك فاكر ان نعم في الاستفتاء مجابتش  استقرار و مفيش بناء ممكن يستقر لو مبني علي اساسات غلط هيفضل يتهز

الاخوان و السلفيين في نفس واحد :هنخليها تولع

1-مراسل قناة مصر 25 : المتظاهرين امام منزل الرئيس مرسي اعمارهم ما بين 12 و 16 سنه و اغلبهم مسيحي الديانة كما قال الشهود

2-جمال صابر (حازمون) علي دريم مع حافظ الميرازي يقول : انا مكنتش عايز اقول ده بس احنا مسكنا ناس بلطجية مسيحيين و اعترفوا ان الكنيسة هي اللي باعتاهم


المشهدين دول انا شفتهم بنفسي في التليفزيون , ودول بيبنوا لاي مدي  ممكن توصل دناءة الاخوان و السلفيين في استماتتهم للحفاظ علي الكرسي في انهم مستعدين يولعوا البلد بفتنة و تحريض طائفي استغلالا للاحتقانات الطائفية الموجودة في المجتمع   حتي لو ده ادي لقتل مصريين اكتر , مش معني انك رئيس منتخب و معاك شرعية الصندوق ان ده هيديك حصانة , انتماءك لجماعة بتمارس تحريض طائفي ضد المسيحيين اضافة لتحريض ضد كل من هو ضد مشروعك بانه ضد الاسلام و انهم يحاربون الله و رسوله , و تحالفك مع قتلة و جماعات تكفيرية مارست العنف و لسه بتهدد بيه (قتلانا في الجنه و قتلاهم في النار) ده يفقدك الشرعية  الاخلاقية  اللي هي اكبر و اهم من شرعية الصندوق

قول نعم للدستور و شجع لعبة ال3 ورقات

انت لما هتقول نعم للدستور هتقول نعم ان سلطة التشريع لمدة شهرين علي الاقل تروح لمجلس الشوري اللي انتخبه 7% من الشعب و اللي ماراحش انتخاباته غير الاخوان و السلفيين لان الناس كانت عارفه انه مجلس ملوش لازمه يعني هتشارك في عملية نصب و كدب سياسي قام بيها الاسلاميين علشان يحافظوا علي مجلس  كان هيتحكم بعدم دستوريته لولا الاعلان الدستوري لكن لانهم بيمثلوا فيه الاغلبية الساحقة قاموا مفصلين مادة في الدستور تخليه مجلس شعب  يطلع قوانين لمدة شهرين او اكتر .. لو ضميرك هيكون مستريح وانت بتشاركهم في ده قول نعم من غير تردد

دي مش مظاهرات ناس بتدافع عن دينها .. دول ناس طلعان دينها

لو بصيت علي وشوش و شكل المتظاهرين عند السفارة الامريكية في قصة الفيلم المسيء ممكن هتلاقي بعضهم بدقن لكن هتلاقي ناس تانيه شوفناهم قبل كده في ايام محمد محمود ووزارة الداخلية .. شباب صغير و غضبان و مستواه المادي متواضع ,  ناس في الحقيقة مش رايحة علشان الفيلم اللي اغلبهم ما شافوش .. هما رايحين يعبروا عن غضبهم من البلد و الحياة و الفقر و القهر و الشرطة و السلطة بحرق عربية ولا بطوب يحدفوه ولا علم ينزلوه  , و موضوع الفيلم ده بالنسبالهم مجرد مبرر لاخراج شحنة الغضب المكبوتة , دول ناس طلعان دينهم في الحياة مش ناس  غيورة علي دين

يا نيابه مفيكيش راجل

من اول التنحي لحد دلوقتي و فيه بلاغات كتير للنيابة ضد احمد شفيق المرشح السابق للرئاسه و بح صوت الناس في انه يتم التحقيق فيها ولا حياة لمن تنادي  , و من بعد ظهور توفيق عكاشه و سبه و شتمه  لناس كتير من اللي شاركوا في الثورة  و اتقدم ضده بلاغات للنيابه ولا حياة لمن تنادي , و اثناء المعركة الرئاسية الانتخابية كانت جريدة الدستور بتنشر اكاذيب  و خرافات عن الاخوان المسلمين و محمد مرسي و لا حياة لمن تنادي ,

                                            ...................................................

                                                          بعد الاطاحه بالعسكري

احمد شفيق علي قوائم ترقب الوصول , احالة ابو حامد لنيابة امن الدولة , استدعاء عكاشه للتحقيق , حبس احتياطي لرئيس تحرير الدستور (اوقفه مرسي بعدها )


ده معناه حاجه واحده انه اي  حد يقولك عندنا نيابه مستقله يبقي عبيط ولا مؤاخذه , احنا عندنا نيابه تابعه للسلطه بتحرك القضايا و توقفها بمزاج القائمين علي السلطه , احنا بنتكلم علي نفس القضايا و نفس الاشخاص و ازاي بيتغير موقف النيابه منهم 180 درجه , ميهمنيش  اللي ماسك اخوان او عسكري او ايا كان , لو كان عندنا نيابه و قضاء مستقلين , لكن بالشكل ده يبقي احنا عايشين في مهزله  تخليني اتخيل ياسر جلال وهو واقف و بيزعق بعلو صوته يا نيابه مفيكيش راجل

                                          

الفيل في التأويل

نحن ابناء ثقافة (التأويل) التأويل من المصطلحات المختلف عليها في علوم الدين والقرآن عند المسلمين فمنهم من قال:يطلق في القرآن والسنة ويراد به التفسير، كما يراد به الحقيقة التي يؤول إليها الأمر أو الخبر.^[1] تأويل الكلام هو الرجوع به إلى مراد المتكلم،(ويكيبيديا) , و التأويل مرتبط بالغموض و محاولة الوصول لتفسير لا يكون في احيان كثيرة منطقيا او مبنيا علي حقائق واضحه , ربما يكون هذا مفهوما في التعامل مع النصوص الدينيه باعتبار أنها تتعامل مع غيبيات يكتنفها الغموض , و لكن المشكلة الحقيقية هي انتقال هذا المنهج الي حياتنا العامه و الخاصه , في العلاقات الشخصية و قرارات العمل , في الزماله و الصداقه , الجميع يبحث عن سر غامض وراء كل تصرف مهما كان بسيطا او واضحا , و بتطبيق ذلك في السياسه دخلنا في متاهه طويلة , لا يخلو أي قرار او حدث من من مجموعة من التأويلات و التخمينات عن نظريات مؤامرة و اتفاقات سرية داخليه و خارجيه , دون الاستناد الي معلومات او حتي تحليل منطقي , مجموعة من التاويلات قد تعتمد علي شخصية صاحبها أو علي اشاعات او قصص مجهولة المصدر , فلنترك منهج التأويل قليلا و لنبحث عن معلومات و عن تحليلات  منطقيه حتي لا نظل غارقين في تهويمات التاويل و تاويل الاوهام

فيلم سكس في رمضان ..... احبووووووش

عندما بدأت تنويهات مسلسل (الزوجة الرابعة) سألت نفسي عن من سيشاهد هذا المسلسل  وهو مجرد تكرار ممل لمسلسل (الحاج متولي) و أن هذه المسلسلات الساذجة لن تلفت انتباه المشاهد المشغول باحداث هامه و الذي اصبح اكثر نضجا , و لكن كانت المفاجأه الشبيهة بتحقيق فيلم "شارع الهرم" اعلي الايرادات في اول عيد بعد الثورة أن المسلسل يعتبر من انجح مسلسلات هذا العام , في اثبات لنظرية احمد مكي و ماجد الكدواني (ماهو علشان اتهرست 100 مره قبل كده هتنجح", و تذكرت وصف المخرج داوود عبد السيد لمسلسل "الحاج متولي" بأنه مسلسل بورنو .. و هو مسلسل مهذب جدا قياسا ب "الزوجة الرابعة"
.. حيث ان فكرة المسلسل كلها قائمة علي الجنس ولا هدف منها سوا اللعب علي الايفيهات و الايحاءات الجنسية , و هو ما لا يختلف عن فيلم بورنو تقوم فيه عدة سيدات بالتنافس علي رجل واحد من اجل ممارسة الجنس معه , وهو ما يتجاوب  معه الجمهور المكبوت عموما و الاكثر كبتا في رمضان , وصولا الي صيام النهار و مشاهدة مسلسل بورنو بعد الافطار .

حادث سيناء الارهابي بين الشرطة و الجيش و "هنعرف نلمها"

بعد 25 يناير اتخذ جهاز الشرطة قرارا بمعاقبة الشعب علي ما قام به تجاه الشرطة , و كان العقاب في صورة تساهل و فلتان امني  , و لكن عندما بدأت عودة الشرطة ظهرت نتيجة ذلك العقاب .. لقد انتشر السلاح و اكتسب البلطجية و اللصوص مكاسب و اماكن جديدة لن يتخلوا عنها بسهولة 

كانت النظرية " سيب الناس تتربي شوية و لما نحب هنعرف نلمها "

منذ عدة سنوات تحولت سيناء لبيئة خصبة للتهريب  للسلاح و المخدرات و البشر و ايضا للجماعات الاسلامية المسلحة , و كانت استرتيجية الجيش و المخابرات هي استغلال تلك الانشطة في الضغط علي اسرائيل من اجل أن تطالب هي بزيادة قوات الجيش في سيناء .. الفكرة هنا هي عقاب اسرائيل بواسطة المهربين و الارهابيين .. حتي وصلنا الي ما حدث بالامس في سلسلة طويلة من جرائم الجماعات الارهابية .. التي خرجت عن سيطرة الجيش و الشرطة و المخابرات

كانت النظرية " سيبهم يقرفوا اسرائيل شوية و لما نحب هنعرف نلمها "

المصيبة أنك في الاساس عاجز علي مستوي الشرطة و الجيش .. باستخدام اسلحة و اجهزة و معدات متخلفة و متهالكة و قيادات ديناصورية عتيقة لن نستطيع أن تقوم بالسيطرة في الاحوال العادية  ما بالك في حالات تساهل متعمد ..تلك هي نتيجته

الاخوان و الفلول اخوات من اب واحد هو السادات

ربما يلاحظ الكثيرين أن توفيق عكاشة (الممثل الشعبي للفلول) يقوم بتقليد السادات سواء في تركيزه علي اصوله الريفيه و استخدام اللهجة  أو في افكاره الاقرب للنازية ,لاحظت أن العديد من مؤيدي شفيق و النظام السابق و من هم  ضد الثورة محبون لسادات , بخلطة دينية نازية قومية رأسمالية , ربما يكون من الواضح أن مؤيدي مبارك هم من محبي السادات حيث أن نظام مبارك هو الامتداد الطبيعي لنظام السادات , و لكن اللافت للنظر أن تيار الاسلامي المتصارع مع الفلول هو ايضا من ابناء السادات و بينما يهاجم الفلول الاخوان باعتبارهم متجرين بالدين في سوق السياسه يتناسون أن السادات هو الأب الروحي لذلك فهو قائل هذه العبارات

مخاطبا نواب الشعب (انا مسؤول امام الله لا امامكم )

"لن يتولي في مصر منصب سياسي او اعلامي او منصب يمس الجماهير اي انسان لا يؤمن بشريعة الله"

"دا دين الدولة الرسمي الاسلام و احنا مش مستعدين نتعامل مع حد يتنكر للاديان"

المعركة القائمة الان هي بين اثنين من ابناء السادات الخليط بين العسكر و اصحاب المال و العكاشيين من جهة و الاخوان و السلفيين من جهة ... انها تركة الانفتاح و الديموقراطية الشكلية و اللعب بالدين في السياسه .. ليست المشكلة في ابناء مبارك بل في ابناء السادات

يا مرسي الناس مش فاهمه اختيارك ... ابقي نجحت

الحقيقة انه الاخوان المسلمين مدهشين .. اللي يشوفوا حماسهم لما اترشحوا علي معظم مقاعد مجلس الشعب في مخالفة لوعدهم و بعد كده منافستهم علي الرئاسة في مخالفة لوعدهم برضه .. يفتكر انهم  جاهزين جدا بالخطط اللي هتخليهم قاعدين لحد تحقيق مشروع النهضة في 2028 .. لكن اللي شفناه بعد فوز محمد مرسي  كان عكس كده .. قلنا يمكن علشان الصدام مع الجيش .. قلنا نستني رئيس الوزرا هو ده اللي هيبين بقي .. كان فيه مطالبات اما برئيس وزرا تكنوقراط يعني حد متخصص علميا في الاقتصاد مثلا باعتباره اهم موضوع دلوقتي .. و سمعنا اسامي محافظين بنك مركزي و خبراء اقتصاديين .. او انه يكون رئيس وزرا سياسي زي دكتور حسام عيسي مثلا او البرادعي .. حد ليه رؤية سياسية عايز يحققها .. يعني  بره مثلا ممكن تلاقي واحدة ست تكون وزيرة دفاع لانها سياسية بتنفذ سياسة حزب .. او سياسي يمسك وزارتين مختلفتين ورا لانه مش متخصص هو جاي كسياسي .. لكن فوجئنا باختيار مسمعناش عنه في عالم السياسة بتاع الناس العاقلين .. اختيار رئيس وزرا مش سياسي ملوش تاريخ ولا انتماء سياسي معين .. ماشي يبقي راجل  متخصص بقي .. في الاقتصاد او في الصناعة او التخطيط .. لاء ده وزير ري  ..  يا ريت الاخوان لما يغرقوا  يبقوا ساعتها ميرموش التهم علي منافسيهم و يعرفوا الميه جاية منين 

حتي مضاجعة الابقار لم تنقذ شفيق و عبد الله كمال

في مقال قديم لاحمد خالد توفيق .. يحكي فيه عن الرئيس الامريكي جونسون الذي طلب من سكرتيره أن ينشر خبرا ينفي فيه أن منافسه يضاجع الابقار .. هكذا كانت تعمل حملة احمد شفيق .. كميات هائله من الشائعات الكاذبة  و علي الاخوان ان ينشغلوا بالنفي او أن يصدق الناس الاشاعات مهما كانت غير منطقيه .. و يبدو أنهم اتبعوا منهج جونسون القذر حرفيا .. عندما قام عمرو عبد السميع بالكتابة عن شائعة مضاجعة الموتي في مجلس الشعب (قيل انها فكرة عبد الله كمال) .. ولم يفكر احد في البحث عن ما اذا كان هذا الكلام قد قيل فعلا ..   شائعة بيع قناة السويس  .. و شائعة منع المرأة من العمل .. و تحويل سيناء لجزء من فلسطين ..  اشاعات يطلقها جهاز  أمن الدولة و خدم امن الدولة و جمال مبارك من أمثال عمرو عبد السميع و عبد الله كمال و توفيق عكاشه  ..فلتذهبوا جميعا الي زريبة التاريخ

سيد درويش العبقري و الافيونجي

كثيرا ما كنت اشاهد الفنان ايمان البحر درويش  في البرامج التليفزيونيه متحدثا عن جده الفنان سيد درويش الذي قتله الانجليز خوفا من الحانه التي كانت تشعل الحماسه الوطنيه , ربما كان اهل سيد درويش لهم عذرهم في تبني نظرية المؤامرة حول وفاة جدهم سيد درويش و لكنهم ليسوا الوحيدين فهناك العديد من الكتب و الكتاب الذين يتبنون نظرية مقتل سيد درويش علي يد الانجليز او موته بسبب الارهاق الشديد   بعد تلحينه للاغنية التي سوف يستقبل بها الشعب سعد زغلول من المنفي (كما في فيلم سيد درويش للمخرج حسن الامام) .....
في مذكرات روز \ فاطمة اليوسف  يمكنك ان تقرأ هذه السطور ..
"و من المرحوم سيد درويش تعلم عزيز عيد داء كان له اثر بالغ في حياته فيما بعد , فقد كان سيد درويش لا تطاوعه الالحان الا اذا وصل الي قمة "الانبساط" بتعاطي كميات ضخمة من المخدرات"

و من خلال المذكرات نعرف أن سيد درويش كان يتعاطي كميات كبيرة من الحشيش و الافيون من اجل تلحين  اوبريت العشرة الطيبة و أنه كان السبب في دخول عزيز عيد لعالم الادمان

كان سيد درويش ملحنا عبقريا و لكنه كان مدمنا للمخدرات ..  بدلا من ان نعترف بهذه الحقيقه حولناه لمناضل قتله الانجليز .. هكذا نصنع اساطيرنا و نظريات المؤامرة الوهمية 

ستون عاما من حكم العسكر بين افخاذ قمر اللبنانيه

امام  دار الامداد و التموين التابعه للقوات المسلحة وقفت اتأمل افيش فيلم (حصل خير) و الذي تعرضه السينما التابعه للدار ...   و علي الافيش تظهر صورة لممثلة لبنانيه تكشف عن فخديها من اجل جذب الجماهير ... تذكرت الضجه التي اثيرت حول هذه الفتاه  عندما طالبت بنسب ابنها لجمال اشرف مروان بعد زواج سري ...   جمال اشرف مروان هو ابن رجل المخابرات المصري اشرف مروان المتهم بتسريب خبر حرب اكتوبر الي اسرائيل ... و هو  حفيد للرئيس جمال عبد الناصر  . و هو صاحب قنوات ميلودي الشهيره ... أي انه قد جمع بين الصله العائليه بعبد الناصر ثم صلة والده بالمخابرات في عصر السادات ... ثم دخوله هو شخصيا لعالم البيزنس في عهد مبارك وولده ... ليصل في النهايه الي علاقه سرية مع مغنية او ممثله لبنانيه باحثه عن الشهره  تكشف عن فخديها علي واجهة احدي دور مناسبات القوات المسلحه في خلطة سحرية بين الحكام العسكريين و المخابرات و الفساد المالي و الجنسي  ... في بروجرام واحد 

علاقة الاقباط بشفيق هي نفس علاقتهم بشبراوي الكوربه

ناس كتير كتبت مستغربه و مستنكره عن نسبة تصويت الاقباط الكبيرة في التصويت لاحمد شفيق برغم ما فعله نظام مبارك و المجلس العسكري مع الاقباط .. 


يوم الجمعه اللي فاتت كنت مع اصدقاء في شبراوي الكوربه منهم صديقه مسيحيه قالتلنا انه المسيحيين بيخلصوا درس في الكنيسه يوم الجمعه و يطلعوا علي شبراوي الكوربه و نتيجه لكده الاغلبيه العظمي من رواد المكان بتكون من المسيحيين .. وصلنا شبراوي الكوربه و فعلا لقيت ان كلامها مظبوط .. و في نفس الوقت لاحظت انه المطعم بجانب انه معندوش غير جريدتين يوميتين اللي هما المصريون (اسلاميه متطرفه) و جريدة حزب الحرية و العداله .. فهو كمان بيشغل القران طول الوقت و بصوت عالي ..و برغم ان ده  شيء متكرر الا انه صاحب المطعم مش بيراعي وجود الاغلبيه من الاقباط و بيستمر في تشغيل القران .. و الاغرب انه المسيحيين برضه مستمرين في الذهاب لنفس المطعم اللي حتي مش بيراعي الزباين بتوعه


تعامل المسيحيين مع شفيق هو نفس تعاملهم مع شبراوي الكوربه ..اعمل فيا اللي انت عايزه بس انا برضه هانفعك 

البلد دي مينفعش يمسكها غير واحد عسكري ..يللا يا ولاد المجنونه

المقوله اللي بتسمعها من كتير من اللي هينتخبوا شفيق البلد عايزه واحد قوي و عسكري يمسكها , طيب تعالي نشوف يا سيدي العسكر اللي مسكوها عملوا ايه ..الاول محمد نجيب تم خلعه بواسطة باقي الظباط الاحرار و تم وضعه تحت الاقامه الجبريه .. التاني : عبد الناصر مات مهزوما هزيمة "عسكري" مذله  بعد انتحار او مقتل نائبه اللي  كان مشير .. التالت مات مقتول في عرض "عسكري" بعد ما ابتدت في عهده حوادث الفتنة الطائفية و الارهاب .. الرابع  دخل التاريخ بكونه اول رئيس يدخل القفص بعد ما الناس خرجت للشوارع و مقدرش يوقفهم .. الخامس .. المجلس العسكري اللي شفنا معاه اكبر فلتان امني و بلطجه و شفنا ناس بتتقتل في الشوارع ولا بنعرف اتقتلوا ازاي و شفنا اكتر من 70 شخص بيموتوا في ماتش كوره بمباركة الامن ..و بعد كل ده تقولي ما ينفعهاش غير واحد عسكري  ..اما انكم عباسية صحيح

شفيق حرامي و هانتخبه

النهارده بعد ما شاف زمايلي الموظفين المستندات اللي تخص بيع شفيق لارارضي لعلاء مبارك في الجرايد قال واحد منهم : هو مين كان يقدر يقولهم لاء ؟


ثم اضاف عن شفيق 


"اه حرامي بس احسن من اللي هينفخونا "


نفس الموظف ده كان ايام مبارك بيؤيده بنظرية انه سرق و شبع و كان عنده نظرية انه طبيعي انه اي حد هيمسك مكان هيحاول يستفيد منه  و اللي بعد كده كان بيشتم مبارك بعد سقوطه هو و اللي حواليه و يقول انهم كانوا سارقين البلد .. رجع تاني لعادته القديمه .. بس الفرق انه الاول كان بيبرر لنفسه وضع اتفرض عليه و بيحاولش يغيره .. دلوقتي هو في مرحلة جديدة انه هو شخصيا ناوي يختار واحد فاسد و بعدها هيقول انه كلهم كده و كنا هنعمل ايه يعني ؟  نجيب منين 80 مليون طبيب نفسي للشعب ده ؟!

احمد شفيق لاخبار اليوم : مستعد لزيارة اسرائيل مقابل خلو رجل

.

< وهل من الممكن أن تزور إسرائيل؟

ــ سوف أذهب إليها إذا كان هناك مبرر لذلك، ولابد أن يقدموا "خلو رجل" لهذه الزيارة بأن يقدموا تحركا نبني عليه خطوة

شفيق مستعد للتنازل اكتر من مبارك  .. مبارك هو فلول شفيق و ليس العكس

تفسير جماهيرية توفيق عكاشة مرتبط بمسلسلات فيفي عبده

من أهم ظواهر ما بعد الثورة .. ظاهرة توفيق عكاشة الذي كان مادة خصبة للسخرية علي شبكة الانترنت في معظم الاوقات و في نفس الوقت  يمكنك أن تندهش عندما تجد أن له شعبية و متابعة ليست بالقليله في الشارع المصري ناهيك عن تلقيه مكالمات اشادة من حمدي بدين و شقيق محمد حسان و حسام سويلم (الخبير الاسترتيجي) .. و في رأيي أن تفسير  ظاهرة توفيق عكاشة لا بد ان يكون علي خلفية من تفسير  شعبية مسلسلات (فيفي عبده) .. يبدأ تناقض العقلية المصرية  من الاهتمام الشديد بالراقصات و الادانة الدائمة لهم .. (فيفي عبده) راقصة منذ سبعينات القرن العشرين .. و لقد  وصلت للنجومية في التسعينيات في السينما و المسرح اعتمادا علي رقصها و استخداما لمفاتنها الجسدية .. و  بمرور الزمن انطفأت نجوميتها و ترهل جسدها .. و كان  من المفترض أن يعني ذلك انتهاء نجوميتها .. و لكنها اتجهت للمسلسلات التليفزيونيه .. و كان المنطقي ان لا يتقبلها الجمهور التليفزيوني المحافظ نتيجة لتاريخها الخارج عن التقاليد ناهيك عن محدودية قدراتها التليفزيونيه  .. و لكن المفارقة أنها قد تحولت لنجمة تليفزيونيه و ذلك من خلال مجموعة من المسلسلات التي استخدمت فيها مجموعة من التيمات المكررة جدا (اتهرست في 100 فيلم عربي قديم) مثل الام المغلوبة علي امرها (الست اصيله) او رحلة كفاح امرأة وسط التجار (سوق الخضار) و اخيرا صراع الضرائر (كيد النسا) و قد كنت أري بنفسي من يهاجمون هذا المسلسل ثم يتابعونه في اهتمام .. و هو نفس ما يحدث مع توفيق عكاشه من استخدام لتيمات مكررة (نظرية مؤامرة كونية) (اللهجة الريفية) و (الردح) و اصطناع البلاهة و هي تيمات (اتهرست في 100 فيلم قبل كده)  و لكنها بعد أن تقابل بسخرية و استنكار من الجمهور  ,فانها تستثير فيهم حنينا لافكار قديمة (متخلفه) و لكنهم يعتادون عليها و يحبون ان يتمسكوا بها .. لذلك فلا غرابة أن يسخروا من عكاشة ثم يقولون (بس و الله بيجيب حاجات جامده) او ان يشتموا فيفي عبده ثم يقولون ( شفتي عملت ايه في سمية الخشاب امبارح) 

عندما يستخدم ابو اسماعيل حيل العوالم و تستخدم سما المصري المنهج السلفي

في برنامج الحقيقة ل وائل الابراشي كان انور البلكيمي غاضبا علي الهاتف و هو يهاجم الراقصة سما المصري التي اشاعت انه زوجها قائلا انها كانت توحي بانه زوجها لانها عند توجيه سؤال لها عن كون البلكيمي زوجها كانت تجيب بأن هذه حياتها الخاصة و أنها لن تصرح باسم زوجها مما يوحي للناس بأنه زوجها .. كان ذلك اسلوبا رخيصا منها للوصول للشهرة بأي ثمن

........................................................

عندما ناقشت اكثر من شخص من مؤيدي حازم صلاح ابو اسماعيل عن كونه لم يذكر بشكل واضح من البداية أن والدته قد حصلت علي (الجرين كارد) من امريكا (علي الاقل) و أن شقيقته تحمل الجنسية الامريكية .. اجابوني بأنه لم يكذب بل انه استخدم (التعريض) وهو أن تكذب بشكل غير مباشر وهو شيء شرعي و مشروع http://www.youtube.com/watch?v=b6VaT5y_gso "فيديو لمعرفة التعريض لو كنت تسمع المصطلح لاول مرة "

و ببساطة اجد ان ما فعلته الراقصة هو استخدامها لمفهوم (التعريض) و ان ما فعله ابو اسماعيل هو استخدام لالاعيب العوالم .. الدين بدون أخلاق اسوأ كثيرا من أخلاق بلا دين

لو انت هتنتخب عمر سليمان علشان الاستقرار .. احب ابشرك بالانفجار

من الواضح أنك مؤيدي عمر سليمان الذين هم نفس مؤيدي المجلس العسكري و مؤيدي مبارك اثناء الثورة و قد يضاف اليهم من تكون لديهم الفزع من سيطرة التيار الاسلامي علي البلاد .. و هم اصحاب مقولات (البلد محتاجه راجل قوي يمسكها) (عايزين البلد تهدي بقي) (لازم حد عسكري يمسك البلد دي) .. و هو ما كان يدفعهم لتأييد المجلس العسكري الذي لم يجلب الامن ولا الاستقرار و لم يستطع منع سيطرة الاسلاميين و تسبب في قتل الناس في الشوارع و في ملاعب الكرة و لم يستطع وقف المظاهرات او حتي قطع الطريق برغم انه يضم 19 عسكريا .. فلا تحلم كثيرا يا عزيزي بعصا سليمان السحرية التي سوف تقوم باخفاء الفوضي و الثوار و الاسلاميين .. بل ان انتخاب سليمان سوف يؤدي الي عودة التحالف بين السلاميين و الثوريين القوي الاسلاميه و المدنيه لعمل ثورة جديدة (و لا اعتقد انك من محبي الثورات) .. فاذا كنت من محبي النظام السابق لهذة الدرجة فاني انصحك باختيار عمرو موسي و ان كنت تميل للاسلاميين و لكنك تخشي تنظيماتهم فعليك ب ابو الفتوح و ان كنت تميل الي مرشح ينادي بالعدالة الاجتماعيه فلتصوت لحمدين صباحي .. اما ان كنت تريد الانفجار وليس الاستقرار فلتعط صوتك لعمر سليمان

المجلس العسكري يقود البلاد الي سيناريو المنصه او سيناريو الجزائر

حتي الان و في ظل المعطيات الحالية يبدو حازم صلاح ابو اسماعيل مرشحا بقوة لدخول جولة الاعادة .. الرجل يملك علي الاقل 25 % من كتلة اصوات مجلس الشعب (من صوتوا للسلفيين) .. اضف الي ذلك المتعاطفين معه من الاخوان و الحالمين بتطبيق الشريعه و الدعاية الدينية في المساجد .. رأيت بنفسي افراد حملته امام المساجد بعد صلاة الجمعه في مدينة نصر .. عندما ذهبت لاحد مولات الكمبيوتر .. كان الكثير من أصحاب المحلات يضعون ملصقاته .. بما يعني انه سوف يتخطي ال 30 % علي اقل تقدير و هذا يكفيه تمام لدخول جولة الاعادة .. بل و تصدر نتائج الجولة الاولي .. و برغم كل الاختلافات مع ابو اسماعيل الا اننا لا نستطيع أن ننكر انه يعادي المجلس العسكري علانية و بكل قوة .. مما يعني أنه بمثابة الكابوس للمجلس العسكري .. وأنه لن يقف مكتوف الايدي امام الخطر الذي يمثله ابو اسماعيل سواء في كونه يتوعدهم او في كونه خارج حسابات المعادلات الداخليه و الخارجيه

السيناريو الكابوسي

أن يترك المجلس العسكري الجولة الاولي تمر دون تدخل و عندما تكون الصدمة بوجود ابو اسماعيل في الاعادة فان ذلك سوف يؤدي الي التدخل في الاعادة .. اما بالتزوير المباشر .. او بحشد الناخبين .. او افساد بعض الدوائر .. و النتيجة التي سوف تعلنها اللجنة العليا غير قابلة للطعن .. يمكنك أن تتخيل في هذه الحالة رد فعل السلفيين .. بل و كل رافضي التزوير .. علي ذلك .. نزول للشوارع .. استخدام المساجد .. يقابله نزول الجيش للشوارع .. ثم سيناريو الجزائر

لا يختلف ما فعله المجلس العسكري عن ما فعله السادات .. كلاهما استخدم الجماعات الدينيه \ السياسية لضرب تيارات مدنيه معارضه له كانت خطة السادات هي التخلص من الناصريين و نجحت الجماعات في التخلص من الناصريين ثم تخلصوا منه شخصيا .. و كانت خطة المجلس العسكري هي التخلص من تيارات الثورة عن طريق الاسلاميين ليصلوا الي كابوس ابو اسماعيل.. و اشعال فتيل الدين السياسي من أجل احراق المزرعة المجاورة غالبا ما ينتهي باحراق مزرعتك

الفرق بين حمار السادات و حمار المشير ..كبير

في فيلم (ايام السادات) كان السادات يطلب من ابنه أن يحكي له عن النكات التي يطلقها عليه الشعب المصري .. مشجعا له أن لا يشعر بالخجل مهما كانت النكتة مسيئة .. فكانت نكتة عن العربجي الذي لم يعبر الكوبري بسبب الضباب الوهمي و عند سؤاله اجاب قائلا (اسأل الحمار) .. ضحك السادات و شرح لابنه وجهة نظره .. لم يغضب لانه كان يريد معرفة ما يقوله الرأي العام .. ولأنه يعرف الشعب المصري جيدا .. كان السادات برغم أي انتقادات له رجل سياسة اكثر منه رجلا عسكريا .. تنقل بين جماعات الاخوان و مصر الفتاة .. حاول الاتصال بالالمان .. انضم لمنظمات سرية .. و شارك في عمليات عنف .. يمكنك مقارنة السادات بطنطاوي (النسخة السمراء من مبارك) .. الموظف العسكري.. بدرجة مشير .. محدود الافق و التفكير .. و هذا ما يجعل مبارك يتمسك به كل هذه السنوات .. يفتقر الي الكاريزما .. بل و يفتقد لمهارات التكلم الاساسية .. لهذا عندما جاء تشبيهه بالحمار .. وهو تشبيه و ليس سب و قذف .. غضب و اصر علي الانتقام ..ولا بد أنه يعتقد أن من يقول ذلك هم العملاء و الخونة او علي اقل تقدير (اللي مش فاهمين) .. انه الفارق بين السياسي الذي يريد معرفة رأي الناس و سخريتهم و بين الموظف المحدود الذي وضعته الاقدار في اعلي المناصب .. اللهم اكفنا شر الموظفين و العسكريين محدودي الذكاء

مفيش قضاء مستقل .. و رئيس لجنة انتخابات الشعب و الشوري و رئيس محكمة الاستئناف ..ساعي عند المجلس العسكري

كنت نتوقع أن تنتهي ازمة المجلس و أمريكا المفتعلة .. و لكن أن تنتهي بهذا الشكل المبتذل و الفاضح .. هذا ما لم اتوقعه .. كان مبارك يفتعل ازمات شبيهة و لكن كان لديه من المحيطين به من يستطيعون اتقان اللعبة .. لكن المجلس العسكري يثبت انه اكثر سذاجة من مبارك .. حيث قام بالتصعيد في محورين الاول هو المعونة الامريكية و استعان فيها بمصطفي بكري و محمد حسان الذي اعلن أن ما يجمعه من نقود ليس له علاقة بموازنة الدولة ولا حتي بموازنة الدولة ( و ضحكت عليك يا مواطن يا عبيط ياللي اتبرعت علشان نستغني عن المعونة) .. اما المحور الثاني و هو الامريكيين المتهمين في قضية المجتمع المدني فقد جاءت النهاية بمثابة فضيحة للقضاء الذي يتلقي التليفونات من أجل التنحي و السماح بالسفر .. و الكارثة ان من يقوم بعمل المكالمات نيابة عن المجلس العسكري هو رئيس لجنة انتخابات مجلسي الشعب و الشوري .. و الذي لم يقم بتوقيع اي عقوبات علي كل من قام بمخالفات في الانتخابات .. ما لم يفهم الان أن العسكر هم الوجه الساذج لمبارك .. لن يفهم ابدا

عن المرشح القطة ..احمد شفيق

لما شفيق فجأة تحول لقط شرس و خربش في البرادعي ده خلاني اكتشف اوجه التشابه العديدة بين شفيق و بين القطة .. اول ما ظهر شفيق كرئيس وزرا .. ناس كتير عجبها ذوقه و طريقته في الكلام اللي بتوصل لدرجة النعومة زي نعومة القطة .. القطط بتكون ناعمه كمظهر تاخد بيه عطف اللي قدامها لكن في لو حصلت علي فرصة لخربشة اللي قدامها بتدا تظهر مخالبها و ده اللي عمله لما لقي انه البرادعي حاليا ملوش ضهر و انه فيه ضوء اخضر من المجلس العسكري و الاسلاميين للهجوم عليه فتحول القط شفيق الناعم لقط شرس بيخربش .. و في نفس الوقت القط شفيق بيتمسح في المشير زي اي قطه عايزة مصلحة من حد قوي .. و القط اللي معروف انه غدار غدر بمبارك اللي كان مربيه .. بعد ما بقي ان صاحبه ملوش فايدة خلاص .. في اجواء القمامة السياسية تظهر القطط بكثافة

ودن المرأة حرام تظهر بس الباقي حلال

ا موظفين 2011

في نقاش حاد عن باروكة صابرين اللي فوق الحجاب و هل تعتبر محجبة ولا لاء حسمه

 الموظف بقوله : يا جماعة انتوا بتتكلموا في ايه ؟ مادام ودنها باينة تبقي مش محجبة

قطع

بعد كام اسبوع

نفس الموظف لزميله : باقولك انا نزلت فيلم شارع الهرم من ع النت بس مش عايز يشتغل

سعد زغلول كان عميل للشيوعيين ..مع تحيات صفحة المجلس العسكري

ان سعدا يتلقي المعونة من البلاشفة الحمر الذين يحاربون الدين و الذين اطاحوا بالقيصر و اقاموا المشانق لامرائهم و اسيادهم لقد ارسلوا ايه يؤيدونه فرد عليهم شاكرا هذا التأييد (من كتاب ارض المعركة لعبد الرحمن الشرقاوي) كتب الكتاب في الفترة بين 1949-1951

من الواضح انه لا جديد .. فلقد كان سعد زغلول متهما بأنه عميل للشيوعية (الا يذكرك ذلك بالاتهامات للبرادعي) و الغريب أن الاتهام يتم بنفس طريقة لجان الحزب الوطني الالكترونية و صحفه القومية التي تحولت بعد ذلك الي تأييد المجلس العسكري و تحولت اللجان الالكترونية الي (ادمن) صفحة المجلس العسكري علي الفيس بوك .. حيث قام البعض باصطياد شكر سعد زغلول و تحويله الي دليل علي عمالة سعد زغلول .. لقد ظل سعد زغلول زعيما في التاريخ و ذهبت هذه الادعاءات الي مزبلة التاريخ .. المكان الذي ينتظر ادمن صفحة المجلس العسكري و المجلس العسكري شخصيا ..

فتوي الاخوان في مجلس الشعب تتيح منع الصلاة في اماكن العمل الحكومية

وأضاف أنه فوجئ بفتوى الشيخ سيد عسكر مفتى الإخوان داخل المجلس بجواز جمع الصلاة فى أثناء العمل

اطالب الاخوان بتطبيق فتواهم في كل اماكن العمل من مصالح و شركات حكومية و حتي شركات القطاع الخاص التي ينتهي عملها قبل موعد صلاة المغرب فاذا كانت مواعيد العمل الرسمية في القطاع الحكومي تنتهي في الثانية مساء فذلك يعني انه من الممكن ان يؤدي الموظفون صلاة الظهر بعد انتهاء العمل او ان يقوموا بالجمع بين صلاتي الظهر و العصر بعد اذان العصر .و بذلك سوف نوفر ما بين نصف ساعة و ساعة يستقطعها الموظفون من وقت عملهم . و هذه فتوي من مقتي الاخوان و ليست فتوي من مفتي الحكومة .هل يطبقها الاخوان عند تشكيلهم للحكومة ؟

الموظفين و الدين و الحيوانات في بروجرام واحد

موظف 1 : السلحفاة اللي انت الي انت اديتهاني ماتت

موظف 2 : لا دي تلاقيها في البيات الشتوي

موظفة : هو صحيح السلحفاة دي بتكون بني ادم و اتسخط بتكون بني ادم يتقاله كوني من

فوقيكي حجر و من تحتيكي حجر ؟

موظف 2 : لاء ده البرص هو اللي بيكون بني ادم اتسخط فيه حاجة في الدين (اذهب فانت برص)

موظف 3 : لاء غلط يا ابني .. مش الرسول ده سيدنا ابراهيم علشان البرص كان بيساعد  النار

تولع فيه و فيه حديث ان اللي يموت برص ياخد حسنة

عن محاولة تهريب سجناء من محكمة شمال القاهرة .. كنت هناك

بينما موظف بيقنع زميله أن يتزوج و يسأله عن مواصفات الزوجة

.. سمعنا صوت اعيرة نارية .. ثم حالة هيستيرية للموظفات بين صراخ و

فزع .. بينما خرج الفضوليون و الفضوليات للبلكونات من أجل الفرجه و

هي هي اهم من القتل ..و أشاعات انهم بيحرقون المحكمة .. ثم

تبين ان ما حدث كان محاولة لتهريب مساجين عن طريق القاء حجارة

من فوق الكوبري و لكن ظابطا اطلق اعيرة نارية في الهواء لمنعها

.. ثم هاجم المواطنون الشرفاء من يلقون بالحجارة و استطاعوا القبض

علي احدهم بينما قفز اخر من فوق الكوبري لينزل مصابا .. و غادر

الموظفون المحكمة قبل مواعيد الانصراف

الجنزوري و طنطاوي و شفيق و مبارك .. انه النكوص

لنكوص Regression هو الارتداد او التقهقر في النشاط النفسي الى مرحلة سابقة من مراحل تطور البناء والتكوين النفسي عند الانسان،وهو يعني ايضا الرجوع الى الخلف(الى مرحلة سابقة من مراحل العمر) في التعامل او السلوك مع الاخرين في مواقف الحياة العديدة.

يلاحظ الكثيرين ان الجنزوري عندما يتحدث في مجلس الشعب فأنه يتحدث عن ماضيه و أنه قد ظلم لمدة 15 عاما و يمكنك تذكر خطاب مبارك الذي يتحدث فيه عن الحرب التي شارك فيها برغم مرور 40 عاما عليها و احمد شفيق (اللي قتل و اتقتل) .. و طنطاوي الذي حارب .. نحن امام مجموعة من العجائز و المرضي النفسيين الذين يقومون عند مواجهة المشاكل بالعودة الي الماضي هروبا من الحاضر .. أعتقد أننا قد اكتفينا بمن يعيشون في الماضي من أمثال الجنزوري و طنطاوي أحمد شفيق و عمرو موسي المرشحان للرئاسة

حتي عمر مكرم كان عنده اجندات اجنبية !

انهم يتهمون الثورة بأن يدا اجنبية تحركها .. حسنا فهي يد الله .. هي يد الشعب و هي يد اجنبية عنهم حقا .. و ستخلص هذه اليد مصر المسكينة من طغيان

ربما تعتقد أن هذه الكلمات قد كتبت خلال عام 2011 .. لقد كتبت هذة الكلمات في اوائل الخمسينات في فصول لعبد الرحمن الشرقاوي عن تاريخ مصر و قد كتبها علي لسان عمر مكرم وهو يناقش علماء السلطان و المتشككين في ثورة المصريين ضد الفرنسيين و أمراء المماليك .. لو كان عمر مكرم مشاركا في ثورة 2011 لكان مصيره المحاكمة العسكرية علي الأرجح او التخوين في افضل الأحوال

مادام كوفتس يبقي حلال الحكومة تاكل حقه

موظف 1: بص كده علي المرتب ده مش كده محسوبة غلط ؟

موظف 2 : اه كده ناقصله 13 جنيه

ثم نظر لاسم المستحق

اسكندر ؟ مش مهم بقي ده كوفتس

اقطع سكة حديد وولع في مقرات و خبي بنزين عادي بس تروح التحرير اسحلك

بقالنا كذا اسبوع مفيش مليونيات و مفيش حد معتصم في التحرير غير عدد لا يذكر في الصينية مش معطلين المرور و الناس دي كانوا هما اللي متهمين بانهم واقفين حال البلد شوف بقي يا سيدي الوضع دلوقتي :

عربيات نقل تقيل بتقطع طريق الاوتوستراد و توقف الدنيا

- ناس بتقتحم ارض الضبعة بمتفجرات

- ازمة بنزين غريبة و غير مبررة

- لواءات جيش ع المعاش بيقطعوا الطريق علشان معاشاتهم

- قطع طريق دولي في سينا احتجاجا علي الانتخابات

- قطع شريط القطر في الصعيد احتجاجا علي نتايج الانتخابات

- قيام مرشحين راسبين بحرق و تدمير مقرات الاخوان في وجه بحري

لا شفنا هيبة دولة ولا طلع حد من المجلس العسكري ولا الجنزوري يتكلم ولا طلع التليفزيون يهيب بالمواطنين الشرفاء و لا عرفنا مصير عجلة الانتاج .. يبقي مين اللي خارب الدنيا بقي ؟

عفاريت الموظفين (الشرارة)

بدأ الموضوع ببياعة الخضار المتقطع اللي بتتعامل مع الموظفات لقيت ملامح وشها غريبة و

بتقول ( و هو ده بايدي ولا بايدك ؟ ده بايد رب الكون )

بعد ما مشيت

موظفة : هي مالها في ايه ؟

موظفة 2 : اصل بنتها لابسها جن بتجيلها حالات بتترعش و تتكلم بصوت غريب

الموظفة المسيحية : طب شغلولها قران

يمكن تكون داست علي حاجة

موظفة 3 : دي ممكن تكون كهربا زيادة

موظف : لا ء مادام بتتكلم بصوت غريب تبقي مش كهربا

و دي كانت شرارة بداية قصص العفاريت من الموظفين .. انتظروا الجزء التاني

لما تقول كل الناس حرامية يبقي انت نفسك تسرق زيهم

الموظف الشاب : ايوه انا طلعت في انتخابات قبل كده و جبت بطايق 12 واحد علي انهم معانا في الانتخابات و خدت الفلوس .. و مرة تانية كنا اتنين مع القاضي فخلانا نقبض ل 4 انفار و و بعد ما وزعنا الفلوس قسمت اللي فضل انا و زميلي

الموظفة : اه كويس ماهو القاضي عارف اصلا ان كده كده الفلوس هتتاخد فادهالكم

قطع

نفس الموظفة : البلد حالتها صعبة ماهو البرادعي لما لقي ان مفيهاش فلوس انسحب

الشيخ الشعراوي كان هيبقي فلول طبعا لو كان حضر الثورة

امبارح سمعت برنامج شاهد علي العصر و حلقة كانت مع الشيخ الشعراوي و كان بيتكلم فيها عن طاعة الابن للاب لانه هو اللي بيصرف عليه و بيقول المفروض الشباب من سن 14 سنة لسن 24 سنة ميتكلمش في السياسة يقعد ال 10 سنين دول يصلح نفسه الاول قبل ما يصلح المجتمع ... و ساعتها فهمت ليه اختاروا ليه المقطع بتاع الثائر الحق ... لانه هو بطبيعته مع السلطة الابوية و مع فكرة الطاعة اللي بتبتدي من الاب و توصل لاولي الامر ... و متأكد انه كان هيكون موقفه مع السلطة و طاعة الحاكم و ضد الثورة و انه كان النظام هيستخدمه زي ما استخدم كتير من رجال الدين . الشعراوي شخصيا اللي لما الناس بتحاول توصفه بانه معارض و شجاع بيفتكروا عبارة ( ان كنت قدرنا فليعنا الله عليك و ان كنا قدرك فليعنك الله علينا) و هي عبارة مطاطة فيها معني مزدوج و مراوغ علي طريقة المعارضة المستحية المستخبية علشان الحاكم ميزعلش . الشعراوي ربنا رحمه انه محضرش الثورة و اتصنف فلول يعد نجاحها و ربنا رحمنا انه مكانش موجود ضد الثورة يمكن كان بوظها

يسقط يسقط حكم البابا \ العسكر

انهانتائج الثورة , و الثورة ليست مجرد تغيير شخص و ليست مجرد تغيير نظام سياسي و لكنها تغيير و اعادة نظر في كل افكار و مؤسسات المجتمع , و من اهم مؤسسات المجتمع التي يخضع لها المصريون هي المؤسسة الدينية , حيث بدانا نشاهد التمرد علي خطباء المساجد ربما لاول مرة ان يعترض البعض علي اقوال بعض خطباء المساجد , مثلا الشيخ محمد حسان المعروف بموالاته لمبارك من قبل ثم موالاته للمجلس العسكري فيما بعد يشتكي من اعتراض بعض المصلين عليه اثناء خطبة الجمعة (في الغالب بسبب مدحه للمجلس العسكري) , ثم نشاهد في قداس عيد الميلاد شبابا يهتفون ضد العسكر في وجودهم اعتراضا علي شكر البابا لهم , لقد بدأت الثورة بالتمرد علي نظام سياسي و لن تنتهي الا بعد التمرد علي مؤسسات المجتمع المختلفة .. لم يكن الهتاف (يسقط يسقط حكم العسكر) فقط بل كان باطنه( يسقط يسقط حكم البابا)

عيل صغير في اعدادي

سنة تمانية و تمانين

. و انا عيل صغير في اعدادي

عنده عجلة و عنده امل

بيحب يقرا

و بياع الجرايد بعيد

في اول كل شهر

اركب عجلتي

اروح في الفجر اشتري المجلة

اللي بخمسين قرش

اللي فيها محمود السعدني

يوميها رحت و في جيبي النص جنيه

و الساعة 6 الصبح

الاقيها بقت بستين قرش

ادور في جيبي علي بريزة

ملقيتش

احترس من السلفي محصل النور

انا في مكان يبدو كأنه مكان للعمل ..الاحظ وجود شخصيين ملتحيين .. يتحركان في المكان يبدو كأنهم يفتشان المكان و يبدو انهم يبحثون عن شيء له علاقة بي .. واحد منهما -فهمت انه محصل النور - يأتي منتصرا و قد جاء بكتاب من غرفتي (المفترض انها في المنزل) و يخبرني بانني امتلك كتابا مخالفا للاسلام و يبدو كأنه يصادره و ربما سوف يعاقبني .. الكتاب يكون عنوانه مشابها لاية قرانية .. و لكني اخبره في انتصار ان هذا الكتاب تابع لهيئة قصور الثقافة .. فلتحاسب الحكومة اذن ... استيقظ قبل موعدي بساعة و نصف .. احاول النوم مرة اخري و لكني لا استطيع النوم مرة اخر